LG Display ընկերությունը, որը մաս է կազմում հարավկորեական LG կորպորացիայի, դեռեւս մեկ տարի առաջ CES-2018 ցուցադրությանը ներկայացրել էր գլանի վերածվող հեռուստացույցի նախատիպը: Յուրօրինակ հեռուստացույցի մասին, բնականաբար, բոլորն արդեն մոռացել էին, բայց նա, այդ ընթացքում պատրաստվում է հայտնվել վաճառքում, հայտնում է Planet Today-ը՝ վկայակոչելով Bloomberg-ը:
Bloomberg վերլուծական գործակալության՝ «հուսալի աղբյուրների» փոխանցմամբ, LG ճկուն հեռուստացույցը, որը բառի բուն իմաստով հնարավոր կլինի վերածել գլանի, կհայտնվի խանութների դարակներում 2019թ.–ին:
Թե կոնկրետ երբ կլինի ինովացիոն սարքի դեբյուտը, հայտնի չէ, բայց կարելի է ենթադրել, որ LG–ն կհիշեցնի իր գյուտի մասին կենցաղային էլեկտրոնիկայի առաջիկա ցուցահանդեսներից մեկում։
Թե որքան կարժենա հեռուստացույցը, ոչ ոք չգիտի, բայց, ամենայն հավանականությամբ, ոչ քիչ։ Ի վերջո, խոսքը նախկինում չտեսնված սարքի մասին է, որը շատ թանկ կարժենա այնքան ժամանակ, քանի դեռ դրա տեխնոլոգիան չի դարձել իսկապես մասսայական։ Իսկ այն, ինչպես նկատում են մասնագետները, կարող է եւ չդառնալ մասսայական, քանի որ ճկուն հեռուստացույցը բավականին սպեցիֆիկ մի բան է։
Հեռուստացույցի դիսփլեյը, ինչպես արդեն գլխի ընկաք, իրականացվել է OLED տեխնոլոգիայով, որը թույլ է տալիս պատրաստել ճկուն էկրաններ՝ պակաս (ամեն դեպքում՝ զգալի )տեխնիկական դժվարություններով։
Հայտնի է, որ հեռուստացույցը կցուցադրվի 65-դյույմանոց էկրանով, որը կարող է շրջվել գլանի եւ մասամբ բացվել՝ օրինակ, որպեսզի թաքցվեն ֆիլմում երեւացող սեւ գծերը: