ԱՄՆ-ում հրազենի օգտագործման հետեւանքով զոհվածների թիվը 2017 թվականին առավելագույնն է վերջին հինգ տասնամյակում, հաղորդում է «ՌԻԱ նովոստին»` վկայակոչելով New York Times-ը:
Ըստ ԱՄՆ-ի Հիվանդությունների վերահսկման եւ կանխարգելման կենտրոնի տվյալների, 2017 թ. հրազենից զոհերի թիվը 39 773 էր՝ 1000-ով ավելի, քան 2016 թվականին: Դեպքերի երկու երրորդը բաժին է ընկել ինքնասպանություններին: Նշվում է, որ սա 1968 թվականից ի վեր ամենաբարձր ցուցանիշն է:
Թերթը նշում է, որ բնակչության թվաքանակի մեջ ճշգրտումներ անելուց հետո հրազենից մահվան դեպքերի մակարդակը աճել է 12 հազար դեպքով՝ 100 հազար մարդու հաշվով։ Սա ամենաբարձր ցուցանիշն է 1990-ականների կեսերից սկսած:
Թերթի ունեցած տեղեկություններով, 2000-ական թվականներին հրազենից մահացության մակարդակը մնացել է կայուն: «Հատկանշական է, որ կայունության շրջանից հետո հիմա մակարդակը կրկին բարձրանում է»,- հայտարարել է Միացյալ Նահանգների Հիվանդությունների վերահսկման եւ կանխարգելման կենտրոնի Մահացությունների վիճակագրության ստորաբաժանման ղեկավար Բոբ Անդերսոնը:
Անդերսոնը նշել է, որ հրազենից զոհերի թվի աճը կարող է կապված լինել թմրանյութերից կախվածության հետ: Թերթի տվյալներով, 2017 թվականին թմրամիջոցների գերդոզավորումից մահացել է շուրջ 70 հազար մարդ:
