Իհարկե, մենք հետեւություններ անում ենք յուրաքանչյուր ցավալի դեպքից, ավելի խստացվել են քննությունների ու ստուգման որակը, երբ պատրաստվում են վարորդները: Այս մասին ՀՀ ՊՆ կենտրոնական հավաքակայանում այսօր՝ հունվարի 8–ին, լրագրողների հետ զրույցում նշեց ՀՀ Զինված ուժերի գլխավոր շտաբի պետ Արտակ Դավթյանը՝ անդրադառնալով զինակոչիկների մասնակցությամբ ողբերգական ավտովթարների խնդրին:
«Ավելի կոշտ պահանջներ ենք ներկայացնում զորամասերին, որպեսզի ավելի մեծ ուշադրություն դարձնեն նման խնդիրներ չլինելու համար»,-ասաց նա:
Դիտարկմանը, որ նման ցավալի դեպքերը շատացել են, Արտակ Դավթյանն արձագանքեց. «Էդ դեպքում խորհուրդ կտամ ամեն օր նայեք պարոն Շամշյանի հաղորդումները, կտեսնեք մեր ճանապարհներին տիրող իրավիճակը եւ համեմատեք Զինված ուժերում պատահարների հետ»:
Նա ընդգծեց, որ վերջին 4 տարվա ընթացքում Զինված ուժերը համալրվել են 2000-ից ավելի նոր մեքենաներով, դրան զուգընթաց իրենց դարն ապրած մեքենաները հանվում են շահագործումից ու դա շարունակական գործընթաց է:
Հարցին, թե կարո՞ղ եք բացառել, որ այս զորակոչից հետո անսարք մեքենա չի հայտնվի զինված ուժերում, ԶՈՒ գլխավոր շտաբի պետն ասաց. «Այդ գործընթացը բացառել ոչ ոք չի կարող: Ցանկացած տեխնիկա, անգամ նորը, հնարավորություն ունի տեխնիկապես անսարք դառնալու, նաեւ վարելու ընթացքում: Մենք ամեն ինչ անում ենք, որ նման տեխնիկա չհայտնվի երթերի ընթացքում: Մանավանդ առանձնահատուկ ուշադրություն դարձնում ենք ժամկետային զինծառայողների կողմից վարվող մեքենաներին: Պայմանագրային զինծառայողի կողմից վարվող մեքենան նույնպես անպայման ստուգվում է երթերից առաջ: Ցավալի դեպքը, որ ունեցանք, դրանից հետո ավելի խստացվեց վերահսկողության հարցերը»:
