ՀՀ երկրորդ նախագահ Ռոբերտ Քոչարյանի պաշտպանները պատրաստվում են դատարանին տրամադրել Մարտի 1-ի դեպքերին առնչվող տեսանյութեր, որոնք նախկինում չեն ներկայացվել: Այս մասին այսօր՝ հունվարի 15-ին, Երևանի ընդհանուր իրավասության դատարանի Կենտրոնի նստավայրում լրագրողների հետ զրույցում ասաց Քոչարյանի պաշտպաններից Հայկ Ալումյանը:
Ներկայացվելիք նյութերը վերաբերում են Մարտի 1-ին նախորդող հանրահավաքներին, ինչպես նաեւ՝ ԱԱԾ տնօրենի և ՀՔԾ պետի հեռախոսային խոսակցությունների վերջին ձայնագրությանը:
«Մեղադրանքի կողմը Քոչարյանին առաջադրված մեղադրանքի հիմքում դրել է այն փաստարկը, որ Մարտի 1-ին նախորդող հանրահավաքները եղել են բացառապես խաղաղ և անզեն: Ի թիվս այլ հանգամանքների, մենք ուզում ենք ամենայն հստակությամբ ցույց տալ, որ այդ հանրահավաքները, մասնավորապես, Գրիգոր Լուսավորիչ փողոցում տեղի ունեցած Մարտի 1-ի հանրահավաքը չի եղել խաղաղ և անզեն»,-ասաց նա: Պաշտպանը նշեց, որ դատարանին է ներկայացվել նաև այն տեսանյութը, որտեղ երևում է, թե ինչպես է մի քաղաքացիական անձ ցուցարների կողմից կրակում ոստիկանական ուժերի ուղղությամբ: Ալումյանը հայտնեց, որ գործով քննիչն այդ տեսանյութը փորձաքննության է ներկայացրել: Քոչարյանի պաշտպանը հույս հայտնեց, որ նախաքննական մարմինը կպարզի, թե ով է այդ կրակոցներն արձակել:
Նշենք, որ այսօրվա հունվարի 15-ի դատական նիստին քննվել է Քոչարյանի կալանքը ևս երկու ամսով երկարաձգելու ՀՔԾ-ի միջնորդությունը, որի վերաբերյալ իրենց առարկություններն են ներկայացրել Քոչարյանի պաշտպաններից Հայկ Ալումյանը և Հովհաննես Խուդոյանը:
Հիշեցնենք, որ երկրորդ նախագահի նկատմամբ ընտրված կալանավորումն այլընտրանքային խափանման միջոց գրավով փոխարինելու վերաբերյալ միջնորդություն են ներկայացրել Քոչարյանի պաշտպանները, իսկ ՀՔԾ–ն միջնորդել է եւս երկու ամիս ժամկետով երկարաձգել Քոչարյանի կալանքի ժամկետը։
Հիշեցնենք, որ 2018թ. դեկտեմբերի 7-ին Վերաքննիչ դատարանը՝ նախագահությամբ դատավոր Ռուբիկ Մխիթարյանի, մերժել էր ՀՀ երկրորդ նախագահ Ռոբերտ Քոչարյանի պաշտպանական թիմի բողոքները եւ անփոփոխ թողել առաջին ատյանի դատարանի հուլիսի 27-ի որոշումը՝ համաձայն որի Ռոբերտ Քոչարյանի նկատմամբ որպես խափանման միջոց էր ընտրվել կալանավորումը։ Երկրոդ նախագահը «Մարտի 1»-ի քրեական գործով մեղադրվում է ՀՀ սահմանադրական կարգը տապալելու համար: