Մեքսիկայի նախկին նախագահ Էնրիկե Պենյա Նյետոյին մեղադրել են թմրաբարոն, «Գաճաճ» մականունով հայտնի Խոակին Գուսման Լոերայից 100 մլն դոլար կաշառք ստանալու մեջ, հայտնում է Aristegui Noticias պորտալը:

Պորտալը հայտնում է, որ մեղադրանքը հնչել է կոլումբիացի թմրագործ Ալեքս Սիֆուենտեսի շուրթերից Նյու Յորքում Գաճաճի գործով դատավարության ժամանակ: Նրա խոսքով՝ ահռելի գումարը Պենյա Նյետոյին է վճարվել 2012 թվականին Մեքսիկայի ղեկավարի պաշտոնը ստանձնելուց մի քանի ամիս առաջ:

Հենց Նյետոյի նախագահության օրոք է Գաճաճը 2 անգամ բռնվել (2014 եւ 2016 թվականներին) եւ արդյունքում ԱՄՆ արտահանձնվել: Պենյա Նյետոն իր պաշտոնավարման ժամանակ նրան բռնելը դասել էր իր կառավարության ձեռքբերումների թվին:

Դեռեւս 2018-ին Գաճաճի փաստաբան Ջեֆրի Լիխթմանը հայտարարել էր, որ իր պաշտպանյալը վճարել է Մեքսիկայի միանգամից 2 նախագահներին, իսկ «Սինալոա» կարտելի իսկական առաջնորդը նա չէր, այլ Իսմայել Սամբադան: Մեքսիկայի 2 նախկին ղեկավարները՝ Ֆելիպե Կալդերոնը (2006-2012 թվականներ) եւ Էնրիկե Պենյա Նյետոն (2012 թվականից) այդ ժամանակ մեղադրանքները հերքել էին:

2006 թվականին Մեքսիկայում Կալդերոնի օրոք թմրամաֆիայի դեմ իսկական պատերազմ էր սկսվել: Պենյա Նյետոյի օրոք թմրաբարոն Գաճաճին միանգամից 2 անգամ են կալանավորել: Նրան նախ ձերբակալել են 2014-ին Մասատլան քաղաքում, բայց 2015-ին նա բանտից փախել է ստորգետնյա թունելով: 2016-ի հունվարին նրան բռնել են Լոս Մոչիս քաղաքում հատուկ գործողության արդյունքում, իսկ այնուհետեւ արտահանձնվել է ԱՄՆ: