Խնդիր իսկապես կա, քանի որ հիվանդին բանակ զորակոչելը կխորացնի հիվանդությունը, ինչը կհանգեցնի լուրջ հետեւանքների: Այս մասին Ազգային ժողովի պաշտպանության եւ անվտանգության հարցերով մշտական հանձնաժողովի նախագահի թեկնածուի քննարկմանը հայտարարեց այդ պաշտոնում առաջադրված թեկնածու, «Իմ քայլը» դաշինքից պատգամավոր Անդրանիկ Քոչարյանը՝ պատասխանելով «Իմ քայլից» պատգամավոր Սասուն Միքայելյանին, ով հարցրեց առողջական խնդիրներ ունեցող երիտասարդների ծառայության մասին:
Նրա խոսքերով, նաեւ զինվորական տեղամասում, որտեղ ծառայում է հիվանդ երիտասարդը, կարող է ծագել անառողջ մթնոլորտ:
«Կա հիվանդությունների ցանկ, որը պարբերաբար փոփոխվում է, բայց պետք է տրամաբանության մեջ փոփոխություններ արվեն, այլ ոչ թե կրճատել հիվանդությունների թիվը՝ ջնջելով դրանք ցուցակից, որպեսզի մեծանա զորակոչիկների թիվը», - պարզաբանեց Քոչարյանը:
Պատգամավորը համոզված է, որ անհրաժեշտ է հստակեցնել լուրջ հիվանդությունների ցանկը եւ պարզել՝ այս կամ այն հիվանդությունը թու՞յլ է տալիս քաղաքացուն կատարել զինվորական ծառայություն, թե՞ դրանք անհամատեղելի են: Քոչարյանը նաեւ նշեց, որ բանակում շարային նախապատրաստություն պետք է անցնեն միայն լիարժեք առողջները, իսկ ոչ շարային ծառայության հարցում, եթե երիտասարդը կարող է գոնե ինչ-որ կերպ օգտակար լինել, դեռ պետք է մտածել:
