Տարածքների հանձնումը ուղղակի խոսքերի մեջ է եւ իրականության հետ կապ չունի: Այս մասին NEWS.am-ի հետ զրույցում նշեց «Մարդկային զարգացման միջազգային կենտրոնի» ղեկավար Թեւան Պողոսյանը՝ անդրադառնալով նրան, որ տարածքների հանձնման մոտեցումը մշտապես եղել է բանակցությունների սեղանին դրված տարբերակների հիմքում:
«Որեւէ մեկը թող չմտածի, որ Ղարաբաղը իր գրպանում է, որ կարող է գրպանից հանի, այդ բլիթից մի մասը պոկի եւ ուրիշին տա: Տարածքների հանձնում չի լինելու, որովհետեւ Արցախն ինքն է իր ճակատագիրը որոշելու եւ ողջ հայությունը պարտավոր է Արցախին նեցուկ կանգնել: Այնպես որ այդ խնդրի մասին խոսելը ավելի շատ նման է ինքներս մեզ ցավ պատճառելուն:
Եթե մի բան գիտենք, որ պատրաստ ենք չանելու, ինչո՞ւ ենք դրա մասին ընդհանրապես խոսում: Այլ խնդիր է, որ պետք է գիտակցենք, թե դա չանելու համար ինչ է պետք անել»,-ասաց նա:
Թեւան Պողոսյանը նկատեց, որ եթե նույնիսկ դիվանագետները խոսում են դրա մասին, մենք պետք է հասկանանք, որ շատ բաներ ունենք կատարելու տանը՝ տնտեսության զարգացում, պետական ինստիտուտների հզորացում, ռազմարդյունաբերության ոլորտի զարկ տալը, բանակի հզորացում, գիտական ներուժի ավելացում:
«Եթե մենք այս ամենն անում ենք, որեւէ մեկը, որքան էլ փորձի սցենարներ գրել, ինչ էլ երազի, որեւէ բան չի կարող անել: Կլինի այն, ինչ մենք ենք երազում: Եկեք մենք մեր երազը կյանքի կոչենք, իսկ թե իր հայտարարություններով Մինսկի խումբը փորձում է նոր այս իրավիճակն օգտագործելով ասել, թե նոր պրոցես է, դրական բան կլինի, եկեք դրա մասին մոռանանք, որովհետեւ ամեն օր սցենարը կարող է փոխվել»:
Թեւան Պողոսյանը համոզմունք հայտնեց, որ ամեն ինչ մեր ձեռքում է, հողն էլ մեր ոտքերի տակ է. «Եթե մեր ոտքի տակի հողը չենք պահելու, որեւէ մեկին պետք չի մեղադրել: Իսկ եթե պահելու ենք, եկեք նման խոսակցություններին հանգիստ վերաբերվենք: Որեւէ մեկը չի պատրաստում հողային խնդրի հաշվին հարցեր լուծել, իսկ եթե փորձի, դա նրան չի հաջողվելու:
Նաեւ գիտեմ, որ 1994-95 թվականներից ի վեր չկա այն մարդը, որը կգնա ու էդ տեսակի հրամանը կտա»,-ընդգծեց նա:
