Ղարաբաղյան հարցով խաղաղության համաձայնագրի՝ «խոշոր պայթյունի» էֆեկտով հեռանկարներ չկան, ինչպես նաեւ համոզիչ բեկման հեռանկարներ չկան՝ տասնամյա ինտենսիվ ռազմականացված մրցակցությունից եւ 2016թ. ապրիլին տեղի ունեցած լուրջ բռնարարքներից հետո: Այս մասին NEWS.am -ի թղթակցի հետ զրույցում հայտարարել է «Caucasus Survey»-ի խմբագիր, Chatham House-ի վերլուծաբան Լոուրենս Բրոերսը:
«Լեռնային Ղարաբաղի ապագայի վերաբերյալ հայկական եւ ադրբեջանական կողմերի հիմնական կառուցվածքային անհամատեղելի գաղափարներից ոչ մեկը չի փոխվել: Սա նշանակում է, որ բեկումների մասին ցանկացած խոսակցություն մոլորության է տանում եւ գուցե նույնիսկ վտանգավոր է», - ասել է Բրոերսը` պատասխանելով այն հարցին, թե արդյոք կան փոփոխություններ հայ-ադրբեջանական հարաբերությունների մեջ եւ արդյոք կարող է բեկում ակնկալվել:
Փորձագետը չի ակնկալում բեկում եւ կարծում է, որ կարեւոր է հեռանալը նման մտածելակերպից: Նա համոզված է, որ 2016թ․-ի ապրիլյան պատերազմը ցույց տվեց, որ «կողմերն ամենեւին էլ պատրաստ չեն երկարատեւ պատերազմի», իսկ ստիպողականությունը, որպես ռազմավարություն, որեւէ արդյունքի չի հանգեցրել:
Այնուամենայնիվ, Բրոերսը նշում է, որ հակամարտող կողմերը հնարավորություն ունեն քաղաքական դաշտ բացելու ոչ բռնի այլընտրանքների համար: «Խաղաղ գործընթացի լայն շրջանակում շատ նոր դեմքեր են հայտնվել` Հայաստանի նոր ղեկավարությունից մինչեւ Ղարաբաղի ադրբեջանական համայնքի նոր առաջնորդը: Վստահ եմ, որ շուտով մենք կտեսնենք փոփոխություններ նաեւ Լեռնային Ղարաբաղի իրական ղեկավարության մեջ: Առաջնորդի փոփոխությունը թույլ է տալիս վերանայել նախորդ ռազմավարությունները, բայց, իհարկե, միայն սա բավարար չէ: Մարդկանց միջեւ շփումների թվի ավելացմանն ուղղված ոչ մեծ քայլերը՝ հակամարտության գծում երկարաժամկետ լարվածության նվազման ֆոնին, կարող են դառնալ ամբիցիաների իրատեսական մակարդակ՝ ներկայիս կոնյունկտուրայում», -նշել է նա:
