Ամերիկյան տիեզերանավ Օրիոնով (Orion) Լուսին կուղարկվեն երկու կանացի մանեկեններ, որպեսզի դրանց միջոցով չափեն ճառագայթման մակարդակը, հաղորդում է «Գազետան»`վկայակոչելով European space agency-ին:
Նշվում է, որ Լուսնի շուրջ Օրիոնի առաջին առաքելության ընթացքում երկու կանացի մանեկենները կզբաղեցնեն ուղեւորների համար հատկացված տեղերը:
Հրապարակման համաձայն, մանեկեններին տրվել էր Հելգա եւ Զոհար անուները: Դրանք բաղկացած են 38 կտոր պլաստիկից, որոնք ներքին օրգանների ամբողջության իմիտացիա են ապահովում: Բացի այդ, նրանք հագեցած են 5,600 սենսորներով, որոնք չափելու են ճառագայթման մակարդակը: Սենսորները տեղադրված են մարմնի՝ ճառագայթման հանդեպ ավելի զգայուն մասերում`թոքերում, ստամոքսում, արգանդում եւ ոսկրածուծում: Երկու մանեկենների միջեւ միակ տարբերությունն այն է, որ Զոհարին կհագցնեն ռադիոպաշտպանիչ ժիլետ, իսկ Հելգան կթռչի առանց դրա։
«Մենք ընտրեցինք կանացի մանեկեններ, քանի որ կին տիեզերագնացների թիվն աճում է, ինչպես նաեւ այն պատճառով, որ կանանց մարմինն ավելի խոցելի է ճառագայթման համար», - ասել է Թոմաս Բերգերը՝ գերմանական աէրոկոսմիկական կենտրոնի առաջատար գիտաշխատակիցը։
Ամերիկյան «Օրիոն» տիեզերանավի մեկնարկը դեպի Լուսին նախատեսվում է 2020 թ. հունիսին:
