Խոցելի քրիստոնյա համայնքների օգնության Հայկական մարդասիրական առաքելությունը կյանքեր է փրկում, կոգեշնչի փրկվածներին եւ հույս կվերածնի: Այս մասին հայտարարել է Հայ դատի հանձնախմբի նախագահ Արամ Համբարյանը:
«Խոցելի քրիստոնյա համայնքների, եկեղեցիների, դպրոցների եւ հիվանդանոցների օգնության Հայկական մարդասիրական առաքելությունը կյանքեր է փրկում, կոգեշնչի փրկվածներին եւ հույս կվերածնի եւ ավելի լայն իմաստով խթան կհանդիսանա Ամերիկայի՝ Սիրիայում եւ ողջ Մերձավոր Արեւելքում քրիստոնեության պահպանման եւ էթնիկական եւ կրոնական բազմազանության պահպանման անդավաճան հանձնառությանը», - ասել է Համբարյանը:
Հիշեցնենք, որ 83 հայ մասնագետներից կազմված խումբը փետրվարի 8-ին ժամանել է Հալեպ քաղաք: Նրանք ռազմական գործողությունների գոտուց դուրս գտնվող Սիրիայի բնակչությանը հումանիտար եւ բժշկական օգնություն կտրամադրեն, ինչպես նաեւ տարածքների ականազերծման աշխատանքներ կիրականացնեն:
