Կառավարության նոր օրինագիծն անհեթեթություն է եւ չի լուծում բնապահպանական խնդիրները: Փետրվարի 9-ին լրագրողների հետ հանդիպման ժամանակ այս մասին ասաց «Վարորդի ընկեր» հասարակական կազմակերպության նախագահ, Հայաստանի Ավտոապահավոագրողների բյուրոյի խորհրդի անդամ Տիգրան Քեհյանը:
Նրա խոսքով՝ նախատեսվում է տրանսպորտային բնապահպանական հարկի եռակի բարձրացում՝ հաշվարկված ավտոմեքենաների շարժիչի մեկ ձիաուժ հզորությամբ, որոնց հզորությունը 301 ձիաուժը գերազանցում է:
«Հարկը յուրաքանչյուր ձիաուժի համար 50 դրամից կհասնի մինչեւ 150 դրամի: Հարկման նման սկզբունքը խնդիրները չի լուծում, եթե ավտոմեքենաները չեն անցնում օրենքով նախատեսված համապատասխան տեխզննում: Անհրաժեշտ է հանել մթնոլորտ վնասակար արտանետումների քանակությունհը եւ դրա հիման վրա հարկ սահմանել: Ձիաուժի մեծությունը դեռեւս չի վկայում այն մասին, որ այս կամ այն ավտոմեքենան այս կամ այն քանակությամբ էկոլոգիապես վնասակար նյութեր է արտանետում»,- նշեց նա:
Տիգրան Քեհյանը շեշտեց, որ անհրաժեշտ է հաշվի առնել ոչ միայն տվյալ մեքենայի շարժիչի հզորությունը, այլեւ այն, թե ինչ վառելիքով է լիցքավորվում, ինչպես նաեւ այլ տեխնիկական բնութագրեր:
Նա նշեց, որ Հայաստանում էլեկտրամոբիլների լայն տարածվածության հնարավորությունը քիչ է, քանի որ առայժմ չկան համապատասխան լիցքավորման կայաններ:
