Իմ այցը Երեւան զուտ աշխատանքային բնույթ է կրում եւ պայմանավորված է Հայաստանի խորհրդարանում Եվրասիական եւ տարածաշրջանային ինտեգրման հարցերով մշտական հանձնաժողովի ստեղծմամբ: Փետրվարի 15-ին Երեւանում լրագորղների հետ զրույցում այս մասին ասաց ՌԴ Պետդումայի Անկախ պետությունների համագործակցության, եվրասիական ինտեգրման եւ հայրենակիցների հետ կապերի հարցերով կոմիտեի նախագահ, «ԿՊՌՖ»-ից պատմագավոր Լեոնիդ Կալաշնիկովը:
Նրա խոսքով՝ մամուլում տարբեր հայտարարությունները եւ հրապարակումներն այն մասին, որ մոտ ապագայում Հայաստանը կարող է անջատվել Եվրասիական միությունից, եւ որ հանրապետությունում կատարված իրադարձությունները, վաղ թե ուշ կհանգեցնեն դրան, միայն խորացնում են իրավիճակը: Եվ այս իրավիճակում Հայաստանի խորհրդարանը ճիշտ ուղղությամբ որոշակի քայլ կատարեց»:
«Հայաստանում այս խորհրդարանական հանձնաժողովի ստեղծումը ինձ շատ ուրախացնում է: Խորհրդարանում հասկանում են, որ Հայաստանին շատ բան է կապում Եվրասիական միության հետ, եւ մենք ունենք շատ սերտ կապեր, որոնք շատ ուժեղ տնտեսական ազդեցություն ունեն: Դա տեսանելի է թվերով: Սրանք այն պատճառներն են, որոնց համար մենք եկել ենք», - ընդգծեց Կալաշնիկովը:
Միեւնույն ժամանակ, պատգամավորը նշեց, որ շատ գաղափարներ արդեն իրականացվել են: ՌԴ խորհրդարանի պատգամավորը նաեւ հավելեց, որ նրանք ցանկանում էին Հայաստանի խորհրդարանի նոր պատգամավորների եւ խմբակցությունների ղեկավարների «աչքերի մեջ նայել», ինչպես նաեւ նրանց հրավիրել ռուսական կողմից հայտարարված իրադարձություններին: Լեոնիդ Կալաշնիկովը տեղեկացրեց, որ ամռանը Մոսկվայում տեղի կունենա երկրորդ միջազգային խորհրդարանական համաժողովը:
