Միջազգային կառույցներում Հայաստանը մշտապես դրսեւորել է Իրանի համար նպաստավոր դիրքորոշում: Այս մասին իրանական «Մեհր» լրատվական գործակալությանը տված ծավալուն հարցազրույցում նշել է Իրանում ՀՀ դեսպան Արտաշես Թումանյանը:
Անդրադառնալով փետրվարի 27-ին Իրանի նախագահ Ռոհանիի հրավերով պաշտոնական այցով ՀՀ վարչապետ Նիկոլ Փաշինյանի Իրան այցելությանը, դեսպանը նշել է. «Այո, Հայաստանի վարչապետ Նիկոլ Փաշինյանն Իրանի նախագահ Հասան Ռոհանիի հրավերով կկատարի իր առաջին պաշտոնական այցն Իրան: Այս այցն ինքնին բխում է Հայաստանի նորընտիր կառավարության արտաքին քաղաքական առաջնահերթություններից, համաձայն որի, Հայաստանը շարունակելու է ակտիվորեն զարգացնել միջպետական հարաբերությունները հարեւան եւ բարեկամ Իրանի հետ:
ՀՀ կառավարության համար սա վճռորոշ ժամանակաշրջան է, քանի որ այս օրերին երկրի խորհրդարանն ընդունելու է առաջիկա հնգամյակի ծրագիրը, որտեղ առանձնահատուկ տեղ է հատկացված արտաքին քաղաքականության խնդիրներին:
Կարծում եմ, որ ամերիկյան պատժամիջոցների գործադրման պայմաններում Իրանի համար եւս կարեւոր է գործընկեր երկրների, մասնավորապես, հարեւան Հայաստանի հետ ունենալ երկարաժամկետ, կայուն եւ փոխշահավետ հարաբերություններ:
Ուստի, հասկանալի է, որ Փաշինյան-Ռոհանի բանակցությունները ներառելու են քաղաքական, տնտեսական, մշակութային եւ այլ ոլորտների հարցերի լայն շրջանակ: Վստահ եմ, որ բոլոր հարցերի վերաբերյալ կլինեն շահագրգիռ եւ գործնական քննարկումներ»:
Հարցին, թե որո՞նք են այն կարեւորագույն ոլորտները, որոնց հիման վրա ձեւավորվել են երկու երկրների հարաբերությունները, Արտաշես Թումանյանը նշել է. «Հայաստան-Իրան միջպետական հարաբերություններն ավելի քան քառորդ դարի պատմություն ունեն: Իրենց ձեւավորման օրվանից մինչ այսօր այդ հարաբերությունները բարեկամական են եւ գործընկերային: Քաղաքական հարաբերություններում երբեք կնճռոտ խնդիրներ չեն եղել, միջազգային կառույցներում Հայաստանը մշտապես դրսեւորել է Իրանի համար նպաստավոր դիրքորոշում: Տնտեսական բնագավառում կարեւոր տեղ է հատկացվել գազի, էներգետիկայի ոլորտի ծրագրերին եւ դրանք այսօր էլ երկկողմ տնտեսական օրակարգի առաջնահերթությունների մեջ են:
Վերջին տարիներին մեծ ակտիվություն է արձանագրվել տուրիզմի ոլորտում եւ մշակութային կապերի ամրապնդման գործում»:
