Ադրբեջանում լրագրողը իր մասնագիտական պարտականությունները կատարելու համար երկարատեւ ազատազրկման է դատապարտվել։

Ծանր հանցագործություններ քննող Բաքվի դատարանում այսօր հրապարակվել է bastainfo.com կայքի գլխավոր խմբագիր Մուստաֆա Հաջիբեյլիի դատավճիռը։ Դատարանը նրան մեղավոր է ճանաչել ՔՕ 309 (պաշտոնեական իրավասությունների չարաշահում), 313 (պաշտոնեական կեղծիք) եւ 281 (պետության դեմ կոչեր) հոդվածներով։ Միաժամանակ, հաշվի առնելով Ղարաբաղյան պատերազմում Հաջիբեյլիի մասնակցությունը, նրա խնամքի ներքո անչափահաս երեխաներ ունենալը, դատարանն օգտագործել է պայմանական պատժի մասին հոդվածը եւ նրան 5,5 տարվա պայմանական ազատազրկման դատապարտել։

Մինչ դատավճիռը կկարդացվեր լրագրողը հանդես է եկել վերջին խոսքով։ Նա քրեական գործը անվանել է «անօրինական եւ անհիմն»։ Հաջիբեյլին աբսուրդ է համարել իրեն պաշտոնական անձ ներկայացնելը եւ պաշտոնեական հանցանքներում մեղադրելը։ «Ես ոչ միայն պաշտոն չունեմ, այլեւ աշխատելու տեղ չունեմ։ Սահմանադրական դատարանը դատախազության հայցով որոշակիացրել է պաշտոնական անձանց ցուցակը, եւ լրագրողներն այնտեղ ներառված չեն»,- ասել է Հաջիբեյլին։ Պաշտպանական կողմը մտադիր է բողոքարկել վճիռը։

2018թ․ հուլիսի 9-ին գլխավոր դատախազությունը քրեական գործ էր հարուցել համացանցում Գյանջայի քաղաքապետ Էլմիրա Վալիեւի դեմ մահափորձի եւ Մենգյաչեւիրում էներգետիկ խնդրի հետ կապված «կեղծ վկայությունների» եւ «անօրինական կոչերի» տարածման համար։ Դրանից հետո դատախազությունը դիմել էր կապի նախարարություն՝ bastainfo.com, criminalaz.com,  topxeber.az եւ fia.az կայքերն արգելափակելու համար։ Սկզբում Հաջիբեյլին գործով որպես վկա էր անցնում։ Սակայն նոյեմբերի 30-ին նրա կարգավիճակը փոխվեց մեղադրյալի։