Հայկական արժեքների պահպանության «ԿԱՄՔ» հասարակական նախաձեռնության անդամները փետրվարի 26–ին ժամը 18.00–ին հանրահավաք է անցկացնելու Ազատության հրապարակում` «Հայրենիքից հող չունենք հանձնելու» կարգախոսով։ Այս մասին այսօր՝ փետրվարի 22-ին, լրագրողների հետ հանդիպմանը հայտարարեց «ԿԱՄՔ» հասարակական նախաձեռնության համակարգող խորհրդի անդամ Վահանգն Չախալյանը։
«Հակված չենք մտածելու, որ հայրենի իշխանությունները հանուն ինքնանպատակ խաղաղության կարող են գնալ ապազգային քայլերի՝ հակառակորդի հետ հնարավոր զիջումներ ու փոխզիջումներ բանակցելով, մյուս կողմից հանրահավաքը դիտարկում ենք այս հարցում լրացուցիչ աջակցություն վարչապետին, բանակցային գործընթացում ազգային եւ պետական շահերի վստահաբար առաջմղման տեսանկյունից»,–նշեց նա։
Վահագն Չախալյանը հավելեց, որ այս հանրահավաքը կապված չէ որեւէ մտավախության հետ. «Եթե մտավախություն չկա, չի նշանակում որ պետք է քնած մնանք»,–նշեց նա։ Հանրահավաքը, նրա խոսքով, կունենա շարունակական բնույթ, քանի դեռ ԼՂ հակամարտությունը լուծում չի ստացել։
