Եվրոպայի անվտանգության եւ համագործակցության կազմակերպության Խորհրդարանական վեհաժողովի ձմեռային խորհրդաժողովի իմ ելույթում ես բարձրացրի ԶԼՄ-ում ապատեղեկատվության հարցը, եւ մենք պայմանավորվեցինք ԵԱՀԿ ներկայացուցիչների հետ միասին լուծումներ որոնել։ Այս մասին փետրվարի 27-ին Ազգային ժողովում, մամուլի ասուլիսի ժամանակ ասել է ԵԱՀԿ ԽՎ հայկական պատվիրակության անդամ, «Լուսավոր Հայաստան» խմբակցության պատգամավոր Անի Սամսոնյանը։
Պատվիրակության անդամի խոսքով՝ նա պատրաստակամություն է հայտնել մասնակցել Խորհրդարանական վեհաժողովի Մարդու իրավունքների եւ մարդասիրական հարցերի կոմիտեի աշխատանքին։ «Եվ այնտեղ ես իմ առաջին ելույթում ԶԼՄ ազատության մասին նշեցի, որ դրանք Հայաստանում ազատ են։ Միեւնույն ժամանակ ելույթս նվիրված էր այն մարտահրավերին, որը մենք այսօր անվանում ենք ապատեղեկատվություն։ Եվ ես նշեցի, որ այդ ապատեղեկատվության դեմ ցանկացած պայքար եւ միջամտություն կարող են վնաս հասցնել ազատ ԶԼՄ աշխատանքին՝ որպես չորրորդ իշխանության»,- ասել է Սամսոնյանը։