Հայաստան-ՌԴ ապրանքաշրջանառությունը կազմում է 2 մլրդ դոլար, ինչը աննախադեպ բարձր աճ է՝ հաշվի առնելով, որ երեք տարի առաջ այդ ցուցանիշը եղել է 1 մլրդ դոլար: Այս մասին այսօր՝ մարտի 12-ին, Աժ-ում լրագրողների հետ զրույցում նշեց ԲՀԿ խմբակցության պատգամավոր, տնտեսագետ Միքայել Մելքումյանը:
Նա նկատեց, որ ԵՏՄ անդամ Բելառուսի հետ ապրանքաշրջանառությունն ընդամենը 30 մլն դոլար է, Ղազախստանի հետ՝ 17 մլն դոլար, Ղրղզստանի հետ՝ ընդամենը 1 մլն դոլար:
«Ղազախստանը Փոթիում կառուցել է մեծ տերմինալ եւ Լարսում երբ մեծ խցանումներ են լինում, մեծ մասամբ նաեւ ղազախական համարներով բեռնատարների խցանում է, որովհետեւ ապրանքը բերում են Փոթի, որտեղից բեռնատարներով տանում են Ղազախստան:
Կամ մենք պետք է Իրանի ճանապարհով գնանք, այսինքն Էնզելի նավահանգիստ, բայց դրա համար պետք է երկաթուղի լինի, հակառակ դեպքում մնում է միայն Լարսի ճանապարհը»,-ասաց պատգամավորը:
Անդրադառնալով Իրան-Հայաստան երկաթուղի կառուցելու կարեւորությանը, Մելքումյանն ասաց. «Գիտեք թե Ադրբեջանը չի՞ ուզում մտնել Իրան ու գնալ մինչեւ Պարսից ծոց: Ինքը դրել է 500 մլն դոլար եւ կառուցում է Աստարա-Ռաշտ երկաթուղին, որի արժեքը 1,1 մլրդ դոլար է: Դա մոտավորապես 450 կմ է:
Խնդիրներ կան, որ մենք չպետք է ասենք՝ դա տնտեսապես այնքան էլ ձեռնտու չէ, քանի որ դա քաղաքական արդյունքներ ու հաղթանակներ է բերում: Անպայման մենք Իրանի հետ երկաթուղային ճանապարհը պետք է ունենանք: Կարողանանք նաեւ երկու թունելները կառուցել, որ կարողանանք արագացնել ու էժանացնել լոգիստիկան:
Եթե ունենանք թանկ լոգիստիկա, բարդություններ ենք ունենալու: Մենք չենք կարող մեր ՀՆԱ կառուցվածքի 80-90 տոկոսը տեխնոլոգիական դարձնենք»:
