Բելառուսը հույս ունի, որ 2020 թվականից կբարձրանա նրա բյուջե մուտքագրվող ԵՏՄ մաքսատուրքերի բաշխումից ստացված գումարը, ասել է հանրապետության փոխվարչապետ Իգոր Պետրիշենկոն «Զվեզդա» թերթին տված հարցազրույցում։
Անցած տարի Բելառուսի նախագահ Ալեքսանդր Լուկաշենկոն ասել էր, որ Մինսկն այլեւս չի աջակցի ԵՏՄ-ում ներկրման մաքսատուրքերի գումարների բաշխման գործող մեթոդիկայի երկարաձգմանը, քանի որ այն շահավետ չէ բելառուսական կողմի համար։ Ինչպես ավելի ուշ ճշտել է հանրապետության ֆիննախարարի առաջին տեղակալ Յուրի Սելիվերստովը, Մինսկն առաջարկում է վերանայել ներկրման մաքսատուրքերի գումարների բաշխման նորմատիվները միության երկրների բյուջեների միջեւ ամեն երեք տարին մեկ՝ «հաշվի առնելով տարբեր գործոններ, այդ թվում եւ ներմուծման ծավալը»։
«Բաշխման նորմատիվների վերահաշվարկման աշխատանքը շարունակվում է եւ, կարծում եմ, կավարտվի 2019 թվականին՝ 2020-ից մեզ համար ներկրման մաքսատուրքերի գումարների բաշխման նորմատիվներով, որոնք կհամապատասխանեն երկրի տնտեսական շահերին»,- ասել է Պետրիշենկոն՝ պարզաբանելով, որ երկրին կգոհացնի բյուջեների միջեւ տուրքերի բաշխման սխեման, բայց «չի գոհացնում մեր բյուջե այլ անդամ պետություններից ներկրվող մաքսատուրքերից բյուջե փոխանցվող գումարը, որը, իր հերթին, կախված է Բելառուսի համար սահմանվող բաշխման նորմատիվի չափից»։
Նա հիշեցրել է, որ ներկրման մաքսատուրքերի բաշխումը Մաքսային միության, իսկ հետո Եվրասիական տնտեսական միության բյուջեների միջեւ տեղի է ունենում 2010 թվականից։ Իսկ միության գործունեության սկզբից (2015 թվական) հաշվարկների սալդոն Բելառուսի համար բացասական է դարձել, ինչը քանիցս հասցվել է Եվրասիական տնտեսական հանձնաժողովի գիտությանը՝ առաջարկելով բաշխման գործող նոմատիվների վերահաշվարկ կատարել, ասել է Պետրիշենկոն։
«Ռուսաստանի համար նույնպես հաշվարկների բացասական սալդո է ձեւավորվում, իսկ Հայաստանը, Ղազախստանը եւ Ղրղզստանը դրական սալդո ունեն եւ փաստորեն հավելյալ եկամուտներ են ստանում ի հաշիվ ներկրման մաքսատուրքերի, որոնց մի մասը պետք է փոխանցվի Բելառուսի բյուջե»,- նշել է փոխվարչապետը։ Նա հավելել է, որ բաշխման նորմատիվների վերանայման անհրաժեշտության վրա ազդել են նաեւ մի շարք այլ գործոններ։
«Նախնական հաշվարկների բոլոր տարբերակներով Բելառուսի համար բաշխման նորմատիվները բարձրանում են 0,65-1,36 տոկոսային կետով եւ նվազում Հայաստանի, Ղրղզստանի համար, իսկ առանձին տարբերակներով նվազում են նաեւ Ղազախստանի ու Ռուսաստանի համար, ինչի առիթով մեր գործընկերները պնդում են ամրագրել գործող նորմատիվները մշտական հիմքով, բայց նման առաջարկը, բնականաբար, Բելառուսը չի պաշտպանում»,- ասել է Պետրիշենկոն։
