ԱՄՆ պետքարտուղար Մայք Պոմպեոն «Հիզբալլահն» անվանել է «կայունության սպառնալիք» Մերձավոր Արեւելքում, տեղեկացնում է Reuters-ը։

Նշենք, որ Պոմպեոն շրջագայում է մերձավորարեւելյան երկրներում՝ Իրանի դեմ ճակատն ուժեղացնելու համար։ Նախօրեին նա այցելել էր Քուվեյթ, որից հետո՝ Իսրայել։

Իսրայելի նախագահ Ռեուվեն Ռիվլինի հետ Երուսաղեմում հանդիպումից հետո Պոմպեոն ասել է, որ «Հիզբալլահը», պաղեստինյան «Համասը» եւ եմենյան հուսիթները «կազմակերպություններ են, որոնք սպառնալիք են ներկայացնում կայունությանը Մերձավոր Արեւելքում եւ Իսրայելում»։ «Նրանք լի են վճռականությամբ՝ ջնջելու այս երկիրը (Իսրայելը) Երկրի երեսից, եւ մենք բարոյական ու քաղաքական պարտավորություններ ունենք թույլ չտալու դա։ Դուք պետք է իմանաք, որ Միացյալ Նահանգները պատրաստ է դրան»,- ասել է Պոմպեոն։

Ռիվլինն ասել է Պոմպեոյին, որ Լիբանանի վարչապետ Սաադ ալ-Հարիրին «չի կարող ոչ ոքի ասել, որ Լիբանանն առանձնացած է «Հիզբալլահից»՝ նկատի ունենալով շարժման ազդեցությունը Լիբանանում։ «Եթե Լիբանանը ինչ-որ քայլեր ձեռնարկի Իսրայելի դեմ,  մենք Լիբանանը պատասխանատու (կողմ) կհամարենք»,- ասել է Ռիվլինը։

Հիշեցնենք, որ ԱՄՆ-ը «Հիզբալլահը» համարում է ահաբեկչական կազմակերպություն։ Իսրայել այցից հետո Պոմպեոն կմեկնի Բեյրութ։