ԱՄՆ նախագահ Դոնալդ Թրամփը, ով ճանաչել է Իսրայելի ինքնիշխանությունը Գոլանի բարձունքների նկատմամբ, «քաղաքական նվեր» է մատուցել վարչապետ Բենիամին Նեթանյահուին, որին ապրիլի 9-ին կայանալիք խորհրդարանական ընտրություններում ծանր պայքար է սպասվում, գրում է The Washington Post-ը:
Երկու առաջնորդները շարունակում են պայմանավորվել, վերնագրում նշել է թերթը:
Թրամփի քննադատներն անհանգստացել են, որ Գոլանի բարձունքների նկատմամբ Իսրայելի ինքնիշխանության ճանաչումը կարող է արդարացնել մյուս երկրներին, որոնք զավթում են օտար տարածքներ, նշում է հրատարակությունը:
Փորձագետները կարծում են, որ Թրամփի հետ Նեթանյահուի մտերիմ եւ բարեկամական հարաբերությունները նրա նախընտրական հավակնությունների օգտին են: Ներկայումս Իսրայելի վարչապետը լուրջ ներքին խնդիրներ ունի՝ գլխավոր դատախազը ձգտում է մեղադրականմ եզրակացության հասնել Նեթանյահուի դեմ կոռուպցիայի մասին երեք գործերով, հիշեցնում է WP-ն:
Մինչ միջազգային հանրությունը Գոլանի բարձունքները համարում է օկուպացված տարածք, Թրամփի որոշումը, ինչպես նաեւ Իսրայելի հետ կապված այլ գործողությունները, արմատապես փոխում են ավանդական ամերիկյան արտաքին քաղաքականությունը:
Երկուշաբթի ԱՄՆ նախագահ Դոնալդ Թրամփը Իսրայելի վարչապետ Բենիամին Նեթանյահուի հետ հանդիպման ժամանակ Գոլանի բարձունքների նկատմամբ Իսրայելի ինքնիշխանությունը ճանաչելու մասին հռչակագիր էր ստորագրել: Ավելի վաղ, Պարսից ծոցի մյուս երկրները, մասնավորապես, Սաուդյան Արաբիան եւ Կատարը դատապարտել էին այդ որոշումը:
Գոլանի բարձունքները մինչեւ 1967 թվականը Սիրիայի տարածքում են եղել: 1967 թ. հունիսի սկզբին վեցօրյա պատերազմում Իսրայելը գրավել էր բարձունքների երկու երրորդը: 1981 թ. դեկտեմբերին Իսրայելի խորհրդարանը Գոլանի բարձունքներում Իսրայելի իրավասությունը տարածելու մասին օրենք էր ընդունել:
ՄԱԿ-ի Անվտանգության խորհուրդը չէր ճանաչել այդ որոշումը: ՄԱԿ-ի Գլխավոր ասամբլեան բազմիցս անեքսիան անօրինական է անվանել եւ Իսրայելին կոչ է արել սիրիացիներին վերադարձնել Գոլանի բարձունքները: