Մարտի 26-ին Ազգային ժողովի նիստում «Պետական թոշակների մասին» օրենքում փոփոխություններ եւ լրացումներ կատարելու օրինագծի քննարկման ժամանակ «Բարգավաճ Հայաստան» խմբակցության պատգամավոր Միքայել Մելքումյանը վրդովմունք էր հայտնել աշխատանքի եւ սոցիալական հարցերի փոխնախարար Սմբատ Սաղիյանի հայտարարության հետ կապված։ Վերջինը ստիպված էր ներողություն խնդրել, տեղեկացնում է NEWS.am-ի թղթակիցը։
Աշխատանքի եւ սոցիալական հարցերի փոխնախարար Սմբատ Սաղիյանը ներկայացնում էր օրինագիծը, որի համաձայն՝ առաջարկվում է նշանակել թոշակի նվազագույն չափը։ Փոխնախարարը տեղեկացրեց, որ այս ծրագրի ներդրման արդյունքում բյուջեի ծախսերը կավելանան հավելյալ 800 մլն դրամով։ Իր հերթին, պատգամավոր Միքայել Մելքումյանը հիշեցրեց այն մասին, որ Հայաստանի կառավարության ծրագրում խոսվում է 2023 թվականին ծայրահեղ աղքատության վերացման մասին, հետո հետաքրքրվեց, թե հարցի որ տոկոսն է լուծում այս լրացումը։ «Եթե գնում եք տնտեսական հեղափոխության եւ սպասում եք ՀՆԱ աճ, ի՞նչ է իրենից ներկայացնում այդ 0,1 տոկոսը։ Ինչո՞ւ չեք բարձրացնում թոշակը մինչեւ 32000 դրամ, որպեսզի ավելի արագ առաջ շարժվենք»,- հետաքրքրվել է պատգամավորը։ Փոխնախարարը պատասխանել է, որ թոշակի բարձրացման կամ որեւէ ճանապարհ նորոգելու հարցը համայնքներում դեռ պետք է քնարկվի։ «Թերեւս, արժե քննարկել եւ հասկանալ՝ ավելի նպատակահարմար է ինչ-որ համայնքային ճանապարհ նորոգել Իջեւանի շրջանո՞ւմ, թե՞ բարձրացնել թոշակի չափը»,- պարզաբանել է փոխնախարարը։ Փոխնախարարի պատասխանը վրդովել է պատգամավորին, եւ Մելքումյանը կոչ է արել քաղաքական հասունություն ցուցաբերել։ «Երբեք մի հակադրեք սոցիալական հարցերը արտադրական բնույթի հարցերին։ Իսկ ո՞վ է ասում, որ ՀՆԱ աճի 0,1 տոկոսը թոշակին ուղղելը նշանակում է ճանապարհներ չկառուցել Իջեւանում կամ մի ուրիշ տեղ։ Հարկավոր է քաղաքական հասունություն ունենալ մեկը մյուսին չհակադրելու համար»,- ասել է պատգամավորը։ Արդյունքում՝ փոխնախարարը ներողություն է խնդրել այն բանի համար, որ նման տպավորություն է հայտնել՝ հավաստիացնելով, որ նպատակը բնավ հակադրումը չէր։