Պետք չէ վախենալ պետական պարտքից եւ դրա բացարձակ մեծությունից: Այս մասին մարտի 28-ին Ազգային ժողովում կառավարության 2018 թվականի գործունեության մասին հաշվետվության քննարկման շրջանակում, ասաց «Իմ քայլը» դաշինքից պատգամավոր, տնտեսական հարցերով մշտական խորհրդարանական հանձնաժողովի նախագահ Բաբկեն Թունյանը:
Նրա համոզմամբ՝ շատ ավելի կարեւոր է այն, թե ինչ նպատակների համար է օգտագործվում նոր պետական պարտքի ներգրավումը:
«Այսինքն, եթե այն նպատակաուղղված է կապիտալ ծախսերին, ենթակառուցվածքների զարգացմանը եւ կհանգեցնի տնտեսական աճին, ապա դա պետք է անպայման արվի», - ասաց նա, թեեւ մինչեւ իշխանության գալը դեմ էր պետական պարտքի ավելացմանը:
Նրա խոսքով, կոռուպցիոն ռիսկեր որոշակի իմաստով գոյություն ունեն, բայց դրանք շատ չեն, եւ, ավելին, Հայաստանի իշխանությունները այս երեւույթի դեմ պայքարի համար քաղաքական կամք ունեն:
«Եթե մարդիկ երկու անգամ պատասխանատվության ենթարկվեն կոռուպցիայի համար, ապա հաջորդ անգամ նրանք նույնիսկ չեն համարձակվի մոտենալ այդ գումարներին», - համոզված է պատգամավորը:
Նա նաեւ նշեց, որ 2018 թ. վերջի դրությամբ պետական պարտքը ՀՆԱ-ի նկատմամբ կազմել է մոտ 51.4 տոկոս: «Այսինքն, մենք 60 տոկոս թույլատրելի շեմից ցածր ենք գնտվում, եւ մենք այդ իմաստով դեռ ռեսուրսներ ունենք: Բայց ես համոզված եմ, որ նույնիսկ եթե մենք գերազանցենք 60 տոկոսի շեմը, ապա լավ ծրագրերի առկայության դեպքում, կարող ենք նույնիսկ վերանայել այս օրենքը», - եզրափակեց Թունյանը:
