Ժնեւում ապրիլի 9-ին մեկնարկել է Տեղեկատվական հանրության համաշխարհային ֆորումը (WSIS), որին մասնակցում է նաեւ ՀՀ տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանը:
Նախարարությունից NEWS.am-ին հայտնում են, որ «WSIS»-ը ավելի քան 170 երկրների հարյուրավոր ներկայացուցիչների, այդ թվում՝ նախարարների, ինչպես նաեւ համաշխարհային հեղինակավոր ընկերությունների եւ կազմակերպությունների ղեկավարների, հնարավորություն է տալիս փոխանակվելու տեղեկատվությամբ, կիսվելու գիտելիքներով եւ փորձով, հետեւելու երեւան եկող միտումներին, կերտելու սերտ համագործակցություն՝ հաշվի առնելով զարգացող տեղեկատվական հանրության կարիքներն ու պահանջները:
«WSIS 2019»-ի խորագիրն է՝ «Տեղեկատվական եւ կապի տեխնոլոգիաները՝ կայուն զարգացման նպատակներին հասնելու համար»:
Նստաշրջանի օրակարգում ելույթ կունենա ՀՀ տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանը: Նախարարը կներկայացնի ՀՀ կառավարության որդեգրած քաղաքականությունը թվային կապի եւ տնտեսության տարբեր ճյուղերում, իրականացվող ծրագրերը եւ հետագա անելիքներն ու ակնկալիքները։
«WSIS»-ը տեղեկատվական եւ կապի տեխնոլոգիաների ոլորտում անցկացվող ամենախոշոր ամենամյա միջոցառումն է, որը կազմակերպում է Հեռահաղորդակցության միջազգային միությունը (ՀՄՄ)՝ ՄԱԿ-ի զարգացման ծրագրի, ՄԱԿ-ի առեւտրի եւ զարգացման համաժողովի եւ ՅՈՒՆԵՍԿՕ-ի հետ համատեղ:
