Մեր կարծիքով՝ օրենքի դրույթի իրականացման ապահովումը, որով նախատեսվում է Հայաստանի օրհներգի հեռարձակում 00:00-ին, անհնար է առանց խախտումների: Այս մասին ապրիլի 10-ին ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերով մշտական հանձնաժողովի նիստում «Հեռուստատեսության եւ ռադիոյի ազգային հանձնաժողովի 2018 թվականի գործունեության մասին» հաշվետվությունը ներկայացնելիս ասաց հանձնաժողովի նախագահ Տիգրան Հակոբյանը:
Հակոբյանի խոսքով՝ իրենք հաճախ են բախվում հենց այս խնդրին: «Գուցե 10 տարի առաջ դա հնարավոր էր, բայց հիմա՝ ոչ: Մենք խնդրի առաջ կկանգնենք: Նույնիսկ դեպքեր են եղել, հնարավոր է՝ դա արվել է հայրենասիրական նպատակներով, բայց պակերացրեք՝ հետաքրքիր ֆիլմ է ընթանում, արդեն գիշեր է, ֆիլմում ցուցադրվում է էրոտիկ տեսարան, եւ այդ պահին հեռուստատեսության աշխատակիցները ստիպված են միացնել ազգային օրհներգի հեռարձակումը: Չեմ կարծում, որ դա քաղաքացիների հայրենասիրական մղումները կբարձրացնի»,- կատակեց Հակոբյանը:
Ընդ որում՝ նա հավելեց, որ խնդիրներ կան նաեւ հեռուստատեսությունում քողարկված գովազդի հեռարձակման հարցում:
