Երեւան քաղաքի պետական հանրակրթական դպրոցներում 2019-2020 ուսումնական տարվա առաջին դասարանցիների ընդունելությունը կատարվելու է բացառապես էլեկտրոնային գրանցման եղանակով: ՀՀ կրթության եւ գիտության նախարարությունում այսօր հրավիրված մամուլի ասուլիսի ժամանակ նախարարի տեղակալ Լուսինե Առաքելյանը եւ Կրթական տեխնոլոգիաների ազգային կենտրոնի /ԿՏԱԿ/ տնօրեն Արտակ Պողոսյանը ներկայացրել են առցանց համակարգը, որը գործարկվելու է 2019 թվականի մայիսի 15-ին` ժամը 09:00-ին:
Ներկայացնելով համակարգը` ԿԳ նախարարի տեղակալ Լուսինե Առաքելյանը նշել է, որ նպատակը բոլորի համար դպրոցի ընտրության մրցակցային հավասար պայմանների ապահովումը, թափանցիկության բարձրացումն ու հնարավոր կոռուպցիոն ռիսկերի չեզոքացումն է. «Հաշվի առնելով, որ առաջին դասարան ընդունվելու գործընթացի հետ կապված նախկինում եղել են դժգոհություններ` ինչպես ծնողների, այնպես էլ տարբեր դպրոցների կողմից, որոշվեց մշակել գրանցման առցանց համակարգ, որպեսզի բոլոր ծնողները հավասար մեկնարկային պայմաններ ունենան: Առցանց համակարգն այս տարի փորձարկվելու է Երեւանում եւ հետագայում կարող է տարածվել նաեւ մարզերում: Յուրաքանչյուր ծնող, աշխարհի ցանկացած ծայրից իր երեխային կարող է առցանց համակարգով գրանցել Երեւանի պետական հանրակրթական դպրոցներ` առաջին դասարան հաճախելու համար»,- նշել է Լուսինե Առաքելյանը: Նախարարի տեղակալի հավաստմամբ` համակարգի ներդրման վերաբերյալ հանրային լայն իրազեկում է նախատեսված: Բացի այդ ԿԳՆ հասարակայնության հետ կապերի եւ տեղեկատվության, հանրակրթության վարչությունների եւ ԿՏԱԿ-ի աշխատակիցները մշտապես տեղեկատվություն կտրամադրեն քաղաքացիներին` տեղեկատու հեռախոսահամարների եւ ֆեյսբուքյան էջի միջոցով: Լ. Առաքելյանի տեղեկացմամբ` Երեւանի պետական հանրակրթական դպրոցները, տրամադրված պետական լիցենզիայի տեղերի շրջանակում, սեպտեմբերի 1-ին կարող են ընդունել 14358 առաջին դասարանցու: Կանխատեսվում է սակայն, որ մայրաքաղաքում դպրոց կհաճախի 13 հազարից մի փոքր ավելի թվով երեխա. «Համակարգը լինելու է թափանցիկ ու հաշվետու եւ նախարարությունը մշտական վերահսկողության տակ է պահելու հայտագրման գործընթացը,- նշել է ԿԳ նախարարի տեղակալը եւ շարունակել,- Միաժամանակ` նկատի ունենալով, որ կարող են լինել քաղաքացիներ, ովքեր կունենան համակարգից օգտվելու դժվարություններ, Երեւանի վարչական շրջաններում նախատեսում ենք ստեղծել կենտրոններ, որոնք նման քաղաքացիներին կաջակցեն հայտագրվել»: Լ. Առաքելյանի խոսքով` աջակցման կենտրոններ են դառնալու ավագ դպրոցները` յուրաքանչյուր վարչական շրջանում մեկ ավագ դպրոց, որոնց ցանկը լրացուցիչ կհրապարակվի: Լ. Առաքելյանը հատուկ ընդգծել է, որ Երեւանի հիմնական դպրոցներին հանձնարարված է որեւէ ինքնիրավչության չդիմել:
ԿՏԱԿ-ի տնօրեն Արտակ Պողոսյանը փորձարկել է առցանց համակարգը` ցույց տալով, թե ինչ հերթական քայլեր է անհրաժեշտ կատարել գրանցման համար:
Առցանց հայտագրման համար անհրաժեշտ է կատարել հետեւյալ քայլերը` մուտք գործել հայտագրման համակարգի՝ https://hayt.emis.am/ էջ, ընտրել համայնքը,
ապա` դպրոցների ցանկից՝ դպրոցը, ստուգել որտեղ կան ազատ տեղեր եւ սեղմել «ավելացնել հայտ» կոճակը։ Եթե կոճակն ակտիվ չէ, նշանակում է՝ տվյալ դպրոցում ազատ տեղեր չկան, հետեւաբար պետք է ընտրել մեկ այլ դպրոց:
Այնուհետեւ պետք է մուտքագրել ծնողներից մեկի հանրային ծառայությունների, այսինքն` սոցիալական քարտի համարանիշը, ծնողի անունը, ազգանունը, գործող էլեկտրոնային փոստի հասցեն ու սեղմել «շարունակել» կոճակը: Այս քայլերը կատարելուց հետո համակարգում կհայտնվի երեխայի հանրային ծառայությունների, այսինքն` սոցիալական քարտի համարանիշը մուտքագրելու համար անհրաժեշտ դաշտը։ Մուտքագրումից հետո համակարգը բնակչության պետական ռեգիստրից ավտոմատ կներբեռնի երեխայի անձնական մյուս տվյալները` անուն, ազգանուն, ծննդյան տարեթիվ եւ այլն։
Տվյալները ստուգելուց հետո պետք է սեղմել «շարունակել» կոճակը, էկրանի վրա կհայտնվի հայտի հաստատումը հավաստող էջն ու Ձեր էլփոստին կուղարկվի ծածկագիր։ Ծածկագիրը տեղադրելով վերեւի պատուհանում, կարող եք մուտք գործել Ձեզ համար ստեղծված էջ եւ տեսնել տեղեկատվություն` դպրոց ընդունվելու համար անհրաժեշտ փաստաթղթերի ցանկի եւ դրանք դպրոց ներկայացնելու ժամկետի մասին։ Ուշադրություն` սահմանված վերջնաժամկետում փաստաթղթերը դպրոց չներկայացնելու դեպքում հայտը կչեղարկվի։ Համակարգը նաեւ հնարավորություն է տալիս սեփական ցանկությամբ Ձեր էջի միջոցով չեղարկել հայտագրումը եւ ընտրել նոր դպրոց:
Արտակ Պողոսյանի տեղեկացմամբ` հնարավոր խնդիրներից եւ դպրոցների կողմից ընդունելության գործընթացին միջամտելու փորձերը բացառելու նկատառումից ելնելով համակարգում ներդրվել է նաեւ պաշտպանական մեխանիզմ: Մասնավորապես այդ նպատակով` Երեւանի հիմնական դպրոցների համակարգիչներից մուտքը դեպի հայտագրման համակարգ արգելափակվելու է: «Բացի այդ` ապրիլի 19-ից կգործարկվի նաեւ stugum.emis.am կայքը, որի միջոցով մինչեւ հայտագրման համակարգի գործարկումը, ծնողները կարող են ստուգել իրենց եւ իրենց երեխաների անձնական տվյալների առկայությունն ու ճշգրտությունը: Ստուգման համար պետք է ընդամենը մուտքագրել հանրային ծառայությունների կամ որ նույնն է` սոցիալական քարտի համարանիշը եւ ստուգել, արդյոք իր եւ երեխայի տվյալները գրանցված են: stugum.emis.am համակարգը ստուգում է նաեւ ծնող-երեխա կապը հավաստող անձնական տվյալների հավաստիությունը: Սա արվել է այն նպատակով, որ որեւէ այլ անձ մեկ այլ երեխայի հայտագրելու հնարավորություն չունենա: Տվյալների մեջ խնդիրներ հայտնաբերելու դեպքում, պետք է դիմել անձնագրային կամ քաղաքացիական ակտերի գրանցման բաժին` անճշտությունները վերացնելու համար»,- նշել է Արտակ Պողոսյանը: ԿՏԱԿ-ի տնօրենը նաեւ նշել է, որ հայտարգրման համակարգը գործարկվելուց հետո բաց է լինելու եւ գործելու է մշտապես` կապ ապահովելով նաեւ դպրոցների առցանց կառավարման համակարգի հետ:
Նշենք, որ Hayt.emis.am համակարգ կարելի է մուտք գործել ցանկացած վայրից:
Հարցերի դեպքում զանգահարել՝ 010-52-73-43, 010-57-84-55, 010-52-47-77 հեռախոսահամարներով: ԿԳՆ-ի կողմից կթողարկվեն նաեւ սոցիալական տեսահոլովակներ, որոնք կհեռարձակվեն տաբեր հարթակներում:
