Շրի Լանկայի իշխանությունը նախօրեին կատարված պայթյունների շարքի համար պատասխանատու է համարել տեղական իսլամիստական խմբավորմանը («Ազգային միասնություն» NTJ): Կոլոմբոյի իշխանությունները նաեւ ստուգում եմ օտարերկրյա իսլամիստական կազմակերպությունների կողմից իսլամիստների աջակցության հավանականությունը, ասել է Շրի Լանկայի կառավարության ներկայացուցիչ Ռայիտա Սենարատնեն, գրում է DW-ն:
«Մենք չենք կարծում, որ երկրի նման փոքր կազմակերպությունը կարող էր դա միայնակ կատարել», - հավելել է նա:
Մինչեւ հիմա NTJ խմբավորումը քիչ հայտնի էր համարվում: 2018-ին նրա անդամները կասկածվում էին բուդդայական արձանները վնասելու մեջ:
Շրի Լանկայի իշխանությունները հաղորդել են երկրում արտակարգ դրության հայտարարման մասին: Որոշումն ընդունվել է զինվորականներին եւ ոստիկանությանը հասարակական անվտանգություն ապահովելու հնարավորության տրամադրման համար, հայտնել են երկրի նախագահ Մայտրիալի Սիրիսենայի գրասենյակից:
Մինչ այդ ապրիլի 22-ին Շրի Լանկայում եւս մեկ պայթյուն էր որոտացել: Պայթուցիկ սարքը գտնվում էր Կոլոմբոյի եկեղեցիներից մեկի մոտ գտնվող բեռնատարում, պայթյունը տեղի էր ունեցել ականազերծման ժամանակ:
Վիրավորների մասին չի հաղորդվում: Ավելի վաղ նույն օրը Կոլոմբոյի ոստիկանությունը քաղաքի կենտրոնում գտնվող ավտոբուսային կանգառում 87 դետոնատորներ էր հայտնաբերել:
Ապրիլի 21-ին պայթյունների զոհ էր դարձել 290 մարդ, եւս 500-ը՝ վիրավորվել: Մահացածների թվում առնվազն 35 օտարերկրացի կա:
Իրավապահ մարմինները ձերբակալել են 24 կասկածյալների, բոլորը Շրի Լանկայի քաղաքացիներ են:
Կոլոմբոյի երեք հինգ աստղանի հյուրանոցներում, ինչպես նաեւ երեք կաթոլիկ եկեղեցիներում պայթյունները գրեթե միաժամանակ էին տեղի ունեցել:
Մի քանի ժամ անց եւս երկու պայթյուն էր տեղի ունեցել, որոնցից մեկը Կոլոմբոյի արվարձանում գտնվող կենդանաբանական այգում: Բացի այդ, պայթուցիկ սարք էր ականազերծվել երկրի ամենամեծ՝ Բանդարանաիկե օդանավակայանի անմիջական հարեւանությամբ:
Կաթոլիկները կազմում են հիմնականում բուդդիստական Շրի Լանկայի բնակչության 6 տոկոսը, բայց դրանք համարվում են երկրում միավորող ուժ, քանի որ կաթոլիկ եկեղեցու անդամներ են եւ թամիլները եւ սինգալները:
