Ապրիլի 23-ին Մասիս քաղաքում անցկացվել է «Ֆրանսիան եւ հայ ժողովուրդը․ Հայոց ցեղասպանությունից մինչեւ մեր օրերը» թեմայով սեմինար, որի նպատակը ֆրանկոլեզու երկրների հանրության շրջանում Հայոց ցեղասպանության, ինչպես նաեւ Ցեղասպանության տարիներին Ֆրանսիայի աջակցության մասին տեղեկացվածության բարձրացումն է։
Իր ելույթում Հայաստանում Ֆրանսիայի նախկին դեսպան Անրի Կյունին հայտարարել է, որ կարեւոր է հիշել հայերի դեմ հանցագործության զոհերի մասին։ Նա նշել է, որ ջերմությամբ է հիշում Հայաստանում անցկացրած տարիները։ «Հայկական մշակույթը կարեւոր նշանակություն ունի քրիստոնեական մշակույթի պահպանման գործում»,- ասել է նա։ Հայաստանի Ֆրանսիական համալսարանի ռեկտոր Ժանի-Մարկ Լավեստը նշել է, որ ֆրանսերենը Հայաստանում կարեւոր տեղ է զբաղեցնում, այն երկու երկրների ամուր հարաբերությունների գրավականն է։