Ցեղասպանությանը ոչ մի իշխանություն պարտադիր չի անդրադառնա, որովհետեւ Ցեղասպանությունը մեկ դար անց մեր պարտականությունն է, որ միշտ լիենք հետեւողական: Այս մասին, այսօր՝ ապրիլի 24-ին, Ծիծեռնակաբերդի հուշահամալիրում լրագրողների հետ զրույցում նշեց «Իմ քայլը» խմբակցության պատգամավոր, ԵԿՄ նախագահ Սասուն Միքայելյանը:
Նրա խոսքով, հայությունը պետք է միշտ համախմբված լինի պետության, պետականության շուրջ, որ նման բաներ չկրկնվեն ամբողջ աշխարհում. «Պետք է հետեւողական լինենք, որ ամբողջ աշխարհը ճանաչի Ցեղասպանությունը»:
Հարցին, թե արդյոք ՀՀ նոր իշխանությունները բավարար ջանքեր գործադրում են Ցեղասպանության ճանաչման գործում, Սասուն Միքայելյանը պատասխանեց. «Որքան հիշում եմ՝ Տիգրան Մեծն է ասել՝ շտապիր, բայց դանդաղ: Շտապելն էլ արդյունք չի տալիս, պետք է կամաց-կամաց, քայլ առ քայլ գնանք: Տարբեր հայտարարությունների մեջ չխճճվենք: Կարեւոր է, որ գործը նորմալ առաջ գնա»:
Ինչ վերաբերում է Թուրքիայի կողմից նախաապայմաններ առաջ քաշելուն, ԵԿՄ նախագահն ասաց. «Մենք պետք է համախմբված լինենք, համալրենք մեր շարքերը, թե ԵԿՄ-ում, թե ամբողջ ազգը պետք է համախմբված լինի: Մենք արցախյան պատերազմը հաղթել ենք ամեն մեկս մեր գործով, մեկը բահով, մեկը գրչով, մեկը զենքով, մեկը սով ու ցուրտ դիմանալով: Հիմա մեր նորօրյա թավշյա հեղափոխությունը էլի ազգը կանգնեց ոտքի, համախմբված գնաց դրան: Մենք երբ համախմբվել ենք հաղթանակներ ենք տարել»,-ասաց Սասուն Միքայելյանը՝ հավելելով, որ Ցեղասպանության ժամանակ չկար այն անհատը, որ կարողանար համախմբել մեր ազգին, որի հետեւանքով էր նաեւ, որ հայ ազգը չկարողացավ դիմակայել: