Հայոց ցեղասպանության ճանաչումը որպես արտաքին քաղաքականության թիվ մեկ խնդիրը դնելը մեր արտաքին քաղաքականության մանեւրելու հնարավորությունները փոքր ինչ փոքրացնում է եւ ընդհանուր առմամբ, որեւէ խնդիրը այդ առումով չի լուծում: Այս մասին, այսօր՝ ապրիլի 24-ին, Ծիծեռնակաբերդի հուշահամալիրում լրագրողների հետ զրույցում նշեց «Հանրապետություն» կուսակցության ղեկավար Արամ Սարգսյանը՝ հավելելով, որ նման խնդիրներ դնելու համար նախ պետք է ուժեղ պետություն դառնալ:
Հարցին, թե արդյոք Հայաստանի նոր իշխանությունը կոնկրետ քայլեր անում է ուժեղ պետություն դառնալու համար, նա պատասխանեց. «Այսօրվա իշխանությունը նոր է եկել եւ այն ժառանգությունը, որ կա այս տարիներին, մնացած, թողած, ԽՍՀՄ-ի ժամանակներից, Առաջին Հանրապետությունից եկած, դա բավականին բարդ ժառանգություն է, առավելեւս հարեւանների հետ փոխհարաբերությունների, Առաջին համաշխարհային պատերազմից հետո, Երկրորդ համաշխարհային պատերազմից հետո, աշխարհաքաղաքական իրավիճակները հաշվի առնելով: Այնպես չի, որ այսօրվա իշխանությունների գործունեությանը 6-7 ամսվա կամ 1 տարվա անցածով կարելի է գնահատական տալ: Սրանք լուրջ խնդիրներ են, որոնք թե քաղաքական, թե տնտեսական, թե ռազմաքաղաքական բալանսի վերականգնման պահանջ են դնում: Դրա համար լուրջ աշխատանք է պետք է անել»: