Հայաստանը պետք է շարունակի իր ջանքերը Հայոց Ցեղասպանության միջազգային ճանաչման համար, անկախ նրանից, թե որ կուսակցությունն է իշխանության: Ծիծեռնակաբերդի հուշահամալիրում լրագրողների հետ զրույցում այս մասին հայտարարեց Հայաստանի նախկին պաշտպանության նախարար Վիգեն Սարգսյանը:
Նախկին նախարարն ընդգծեց, որ սա ոչ միայն պատմական արդարության վերականգնման, այլեւ Հայաստանի անվտանգության հարց է: Մանավանդ, որ Թուրքիայից շարունակում են հայտարարություններ հնչել, որոնք վկայում են ասվածի արդարության մասին:
Միեւնույն ժամանակ, Հայաստանը, որպես ցեղասպանություն վերապրած երկիր, պետք է ջանքեր գործադրի, որպեսզի այլեւս նման բան չլինի: «Մենք ցեղասպանություն ենք վերապրել եւ չպետք է դադարենք պայքարել դրա ճանաչման համար», - ասաց Վիգեն Սարգսյանը, շնորհակալություն հայտնելով երկրներին եւ միջազգային կազմակերպություններին Ցեղասպանությունը վերապրածներին օգնելու համար:
«Պետք է հստակ հիշել, որ ցեղասպանությունը, ողբերգություն լինելով, առաջին հերթին հանցագործություն է: Եվ դա անվտանգության հարց է», - ընդգծեց Սարգսյանը:
