Ամերիկյան Relativity ընկերությունը (կենտրոնատեղին՝ Լոս Անջելես, Կալիֆոռնիա) մտադիր է ստեղծել կրող հրթիռ, որի բոլոր մասերը առաջին անգամ կստեղծվեն 3D տպիչի օգնությամբ։ Ինչպես հինգշաբթի տեղեկացրել է Space.com ինտերնետ-պորտալը, երկաստիճան Terran-1 հրթիռը ցածր ուղեծիր կհանի 1250 կիլոգրամ օգտակար բեռ։ Մեկ արձակման արժեքը կկազմի 10 մլն դոլար, տեղեկացնում է ՏԱՍՍ-ը։

Ընկերության ներկայացուցիչների հավաստմամբ, նրանց է պատկանում աշխարհում ամենամեծ Stargate 3D տպիչը, որը կարող է տպել հրթիռի մասերը 60 օրվա ընթացքում։ Stargate-ը անընդհատ բարելավվում է եւ գործում ավելի արագ՝ ի հաշիվ տվիչների եւ ավտոմատ ուսուցման համակարգի օգտագործման, նշում են ընկերության ներկայացուցիչները։ «Մենք ստեղծում ենք արտադրության միանգամայն նոր տեսակ»։

Ընկերությունն արդեն ստորագրել է կանադական Telesat արբանյակի արձակման պայմանագիրը, ինչպես նաեւ պայմանավորվածություն ձեռք բերել 2022-ին Թաիլանդի հեռահաղորդակցային ընկերության արբանյակ արձակելու մասին։

Ավելի վաղ, The Fabricator պորտալի տվյալներով, Relativity ընկերությունը պատրաստել էր շարժիչ Aeon-1 հրթիռի համար՝ ավելի քան 100 բաղադրիչից կազմված։ 3D տպիչի օգտագործումը թույլ կտա պատրաստել կրող հրթիռ մոտավորապես հազար հանգույցներից, այն դեպքում, երբ սովորական մեթոդով հրթիռ ստեղծելիս հանգույցների թիվը գերազանցում է 100 հազարը։