Հայաստանում պետք է աշխատանքներ տարվեն մտավոր սեփականության պաշտպանության համակարգի զարգացման ուղղությամբ։ Այս մասին ապրիլի 26-ին «Մտավոր սեփականության կարեւորությունը տնտեսական հեղափոխության իրականացման գործում» կոնֆերանսում ասել է Հայաստանի տարածքային կառավարման եւ զարգացման փոխնախարար Ավագ Ավանեսյանը։

Նրա խոսքով՝ տնտեսական աճը 21-րդ դարում սերտորեն կապված է մտավոր սեփականության ոլորտում ներդրումների հետ։ «Առանց այդ սեփականության պաշտպանության երաշխիքների չի լինի երաշխիք, որ աշխատանքը կունենա այն արդյունքը, որին սպասում է մարդը։ Պետք է հասնել այն բանին, որպեսզի քաղաքացիներն իմանան եւ կարողանան պաշտպանել իրենց իրավունքները դատարանում»,- նշել է նա։

Ավանեսյանն ընդգծել է, որ, օրինակ, ցավոք, սննդի 900 օբյեկտներից միայն 41-ն է վճարում հեղինակային իրավունքների համար այն դեպքում, երբ վճարման գումարը կազմում է ընդամենը մոտավորապես 45-50 հազար դրամ տարեկան։ «Սա խոսում է այն մասին, որ թե՛ պետությունը, թե՛ հասարակությունը պպետք է լրջորեն աշխատեն այս ուղղությամբ»,- ամփոփել է նա։