Շրի Լանկայի կառավարությունը երկրի անվտանգության ոլորտում պահպանվող բարդ իրավիճակի համատեքստում նորից մի շարք սոցցանցերի եւ մեսենջերների օգտագործման ժամանակավոր արգելք է մտցրել, տեղեկացնում է ՌԻԱ «Նովոստի»-ն՝ հղում կատարելով News1st հեռուստաալիքին։

Նրա տվյալների համաձայն՝ սահմանափակումները վերաբերում են նաեւ YouTube տեսահոսթինգին, Facebook սոցցանցին, ինչպես նաեւ լայնորեն տարածված Whatsapp եւ Viber մեսենջերներին։ Այս տվյալները հաստատում է նաեւ netblocks.org կայքը, որը հետեւում է տարբեր երկրների օգտատերերի ակտիվությանը։

Հեռուստաալիքը նշում է, որ նորից արգելափակելու մասին որոշումն ընդունվել է Նեգոմբո քաղաքի վերջին իրադարձություններից հետո։ Անցած շաբաթվա վերջին այնտեղ տեղի են ունեցել բախումներ քրիստոնեական եւ մուսուլմանական կրոնական համայնքների ներկայացուցիչների միջեւ, ինչից հետո քաղաքում մինչեւ մայիսի 6-ը մտցվել է պարետային ժամ։ Այդ ամբողջ ընթացքում Նեգոմբոյի փողոցներում հերթապահել են ոստիկանության ուժեղացված ջոկատները։

Սոցցանցերը եւ մեսենջերները Շրի Լանկայում ժամանակավորապես փակվել են ապրիլի 21-ին, այն բանից հետո, երբ երկրում ութ պայթյուն է որոտացել՝ խլելով, ըստ առողջապահության նախարարության տվյալների՝ 250-260 մարդու կյանք։ Պատասխանատվությունն ստանձնել է ԻՊ ահաբեկչական խմբավորումը։ Իշխանությունների վերջին տեղեկատվության համաձայն՝ զոհվածների մեջ կա 42 օտարերկրացի, ռուսաստանցիներ չկան։

Շրի Լանկայի կառավարության տեղեկատվությամբ՝ կղզեպետության տարածքում գործում է ԻՊ մոտ 130-140 անդամ։ Քննության վարկածով՝ Զատկվա կիրակիի հարձակումներին մասնակցել է ինը մահապարտ ահաբեկիչ, բոլոր զինյալների անձը պարզված է։