Երկրների միջեւ հարաբերությունները գնահատվում են ոչ թե այցերով, այլ բանակցությունների բովանդակությամբ։ Այս մասին Երեւանում կայացած ճեպազրույցում հայտարարել է ԱՄՆ պետքարտուղարի օգնականի տեղակալ Ջորջ Քենթը՝ պատասխանելով հայ-ամերիկյան հարաբերություններում առաջընթացի բացակայության եւ ԱՄՆ նախագահ Դոնալդ Թրամփի եւ ՀՀ վարչապետ Նիկոլ Փաշինյանի հանդիպման հնարավորության մասին հարցին։
Պետդեպի ներկայացուցիչը հիշեցրել է, որ հայկական կողմի հետ բանակցություննների ընթացքում քննարկվել է հարցերի լայն շրջանակ։ «Վարչապետի եւ կառավարության անդամների հետ քննարկվել են բազմաթիվ հարցեր։ Այսօր մենք նիստը սկսել ենք արդարադատությանը եւ կոռուպցիայի դեմ պայքարին վերաբերող հարցերով։ Օրվա վերջին քննարկել ենք բնապահապանությանը, կենդանատեսակներին, ջրին վերաբերող խնդիրներ։ Դա խոսում է քննարկվող հարցերի բազմաբնույթ լինելու մասին»,- ընդգծել է Ջորջ Քենթը։ Թրամփի եւ Փաշինյանի հանդիպման հնարավորության մասին հարցին Քենթն այդպես էլ չի պատասխանել։