News
Լրահոս
News
Հինգշաբթի
Հունիս 27
USD
477.33
EUR
542.2
RUB
7.56
ME-USD
0.17
Տեսնել լրահոսը

Վարչապետ Նիկոլ Փաշինյանը մայիսի 19-ին կոչ էր արել քաղաքացիներին մայիսի 20-ի առավոտյան ժամը 8:30-ից արգելափակել բոլոր դատարանների մուտքերը եւ թույլ չտալ որեւէ մեկի մուտք գործել դատարաններ:

«Իրազեկ քաղաքացիների միավորում» ՀԿ-ն «Փաստերի ստուգման հարթակի» հետ համատեղ վաղ առավոտից այցելել է Երեւանում առկա բոլոր դատարանները՝ փորձելով պարզել, թե ինչպես են քաղաքացիներն արձագանքել վարչապետի կոչին: Այսպես, ժամը 8:40-ից.

Կենտրոն եւ Նորք-Մարաշ վարչական շրջանների ընդհանուր իրավասության դատարանի բոլոր մուտքերը փակ էին: Այստեղ հավաքված էր մոտ 150 ցուցարար, 4 մեքենայով արգելափակել էր դատարանի գլխավոր մուտքը: Ցուցարարների թիվն այստեղ գնալով ավելացել էր՝ հասնելով մոտ 300-ին: Այստեղ էր նաեւ «Իմ քայլը» խմբակցության պատգամավոր Նարինե Թուխիկյանը:

Ավան եւ Նոր Նորք վարչական շրջանների ընդհանուր իրավասության դատարանի մոտ հավաքվել էր մոտ 80 ցուցարար, նրանց թվում էր ՊՎԾ նախկին պետ Դավիթ Սանասարյանը։ Ավելի ուշ ցուցարարների թիվը հասել էր մոտ 150-ի, նրանց են միացել «Իմ քայլի» պատգամավորներ Հայկ Կոնջորյանը, Տաթեւիկ Հայրապետյանը, Մխիթար Հայրապետյանը:

Էրեբունի եւ Նուբարաշեն վարչական շրջանների ընդհանուր իրավասության դատարանի շենքի բոլոր մուտքերն արգելափակված էին, այստեղ հավաքված էր մոտ 50 ցուցարար, նրանց թվում էին պատգամավորներ Արմեն Փամբուխչյանը եւ Հակոբ Սիմիդյանը:

Վարչական վերաքննիչ դատարանի շենքի մոտ ցուցարարների թիվը հասնում էր 20-25-ի, նրանց թվում էին պատգամավորներ Սարգիս Խանդանյանը, Հերիքնազ Տիգրանյանը եւ Քրիստինե Պողոսյանը:

Արաբկիր եւ Քանաքեռ Զեյթուն վարչական շրջանների ընդհանուր իրավասության դատարանի մոտ ցուցարարների թիվը հասել էր 140-150: Այստեղ էին նաեւ «Իմ քայլի» պատգամավորներ Արման Եղոյանը եւ Նիկոլայ Բաղդասարյանը:

Շենգավիթ վարչական շրջանի ընդհանուր իրավասության դատարանի մոտ վաղ առավոտյան շուրջ 20 մարդ փակել էր դատարանի թե՛ ծառայողական, թե՛ հիմնական մուտքերը։ Ավելի ուշ ցուցարարների թիվը հասել էր մոտ 40-ի:

Աջափնյակ եւ Դավթաշեն վարչական շրջանների ընդհանուր իրավասության դատարանի մուտքերը նույնպես փակ էին: Այստեղ հավաքված էր 80 մարդ, մեքենաներ: Այստեղ էին նաեւ «Իմ քայլի» պատգամավորներ Լիլիթ Մակունցը եւ Վահագն Հովակիմյանը:

Վերաքննիչ քաղաքացիական դատարանի եւ Վարչական դատարանի մուտքի մոտ հավաքվածների թիվը հասնում էր մոտ 150-ի: Նրանք արգելափակել էին բոլոր մուտքերը եւ թույլ չէին տալիս որեւէ մեկին մուտք գործել շենք՝ չնայած ոստիկանների կոչին: Այստեղ էին «Իմ քայլի» պատգամավորներ Գեւորգ Պապոյանը եւ Բաբկեն Թունյանը:

Բարձրագույն դատական խորհրդի դիմաց հավաքվել էին 7-10 մարդ, որոնք եւս արգելափակել էին մուտքը:

Վճռաբեկ դատարանի մոտ հավաքված էր շուրջ 50 ցուցարար, դատարանի բոլոր մուտքերը փակ էին, այստեղ էր «Իմ քայլի» պատգամավոր Մարիա Կարապետյանը։

Փակ էին նաեւ Սահմանադրական դատարանի մուտքերը, այստեղ ցուցարարների թիվը հասնում էր 150-ի:

Այսպիսով, ժամը 10:00-ի դրությամբ, վարչապետի կոչին միայն Երեւանում արձագանքել էր մոտ 1100 մարդ, բոլոր դատարանների մուտքերը փակ էին: Ցուցարարներից բացի, հավաքված էին մեծ թվով ոստիկաններ: Գրեթե բոլոր դատարանների մոտ ներկա էին նաեւ ԱԺ «Իմ քայլը» խմբակցության պատգամավորներ:

Տպել
Կարդացեք նաև
Ամբողջը
Գիլյոտին հների եւ նորերի համար. Էլինար Վարդանյան
Եթե սա նոր Հայաստանում մարսվի, ապա վստահ եղեք վաղը լինելու են նորանոր նմանատիպ դատեր...
«Ժողովուրդ». Նոր մանրամասներ վեթինգից. Հայտնի են ժամկետներն ու մեխանիզմները
Աշնանը նախագիծն ամբողջությամբ կընդունվի...
«Հրապարակ». Ուշագրավ տրանսֆորմացիա. ցույց ցրողից՝ ցուցարար. Ռոբերտ Մելքոնյանը՝ ՎԵՏՕ-ի անդամ
Երեւանի նախկին փոխոստիկանապետ Ռոբերտ Մելքոնյանը, որ ժամանակին Վալերի Օսիպյանի հետ ցույցեր էր ցրում...
«Հրապարակ». Ուշագրավ տրանսֆորմացիա. ցույց ցրողից՝ ցուցարար. Ռոբերտ Մելքոնյանը՝ ՎԵՏՕ-ի անդամ
Երեւանի նախկին փոխոստիկանապետ Ռոբերտ Մելքոնյանը, որ ժամանակին Վալերի Օսիպյանի հետ ցույցեր էր ցրում...
«Հրապարակ». «ՍԴ լիազորություններին տիրանալը իշխանազավթում է». Գեւորգ Կոստանյան
Վստահ եմ, որ ՍԴ-ն շարունակելու է իր գործունեությունը Սահմանադրությամբ եւ օրենքներով...
«Ժողովուրդ». Տիգրան Ավինյանը կառավարություն է կանչել ՔԿ ծառայության պետին. պաշտոնանկություն կլինի՞
Ձեր կողմից նշված հանդիպումը կայացել է...