ԲԴԽ–ում քիչ առաջ ավարտվեց ՀՀ արդարադատության նախարար Արտակ Զեյնալյանի միջնորդության հիման վրա ՀՀ վճռաբեկ դատարանի քաղաքացիական և վարչական պալատի 10 դատավորների կարգապահական պատասխանատվության ենթարկելու հարցի քննությունը։
ՄԻջնորդությունը լսելուց և նիստին մասնակցող անձանց ամփոփիչ ելույթները լսելուց հետո Խորհուրդը հարցի քննությունը հայտարարեց ավարտված և հեռացավ խորհրդակցական սենյակ՝ որոշում կայացնելու. այն կհրապարակվի հունիսի 14–ին, ժամը 16:00–ին։
Նշենք, որ միջնորդության համար հիմք է հանդիսացել այն հանգամանքը, որ Վճռաբեկ դատարանի քաղաքացիական և վարչական պալատը որոշել է վարույթ չընդունել քաղաքացու հայցը։
Մասնավորապես, 2018թ. սեպտեմբերի 3-ին պատասխանողի ներկայացուցիչն անշարժ գույքի առուվաճառքի գործով նոր երևան եկած հանգամանքի հիմքով վճռաբեկ բողոք է ներկայացրել, որը Վճռաբեկ դատարանը մեկ ամիս անց վերադարձրել է՝ առաջարկելով շտկել իր որոշմամբ մատնանշված թերությունները և վճռաբեկ բողոքը կրկին ներկայացնել:
Բողոքը բերող անձը շտկել է թերությունները և կրկին ներկայացրել այն, սակայն Վճռաբեկ դատարանը 2018 թվականի դեկտեմբերի 12-ին մերժել է բողոքը վարույթ ընդունել։
Բողոք բերող անձի ներկայացուցիչ, փաստաբան Գևորգ Դավթյանը 2019 թվականի հունվարի 11-ին դիմել է ՀՀ արդարադատության նախարար Արտակ Զեյնալյանին՝ Վճռաբեկ դատարանի քաղաքացիական և վարչական պալատի 10 դատավորների նկատմամբ կարգապահական վարույթ հարուցելու խնդրով: ՀՀ արդարադատության նախարար Արտակ Զեյնալյանը 2019 թվականի ապրիլին ՀՀ վճռաբեկ դատարանի քաղաքացիական և վարչական պալատի 10 դատավորների կարգապահական պատասխանատվության ենթարկելու վերաբերյալ միջնորդությամբ Բարձրագույն դատական խորհուրդ դիմելու մասին որոշում:
