Հայաստանում միայն 1320 մարդ է ամսական 2 մլն դրամից ավելի աշխատավարձ ստանում: Հունիսի 7-ին ԱԺ արտահերթ նիստում Հարկային օրենսգրքում փոփոխություններ կատարելու մասին օրինագծի քննարկման ժամանակ այս մասին ասաց ֆինանսների փոխնախարար, հիմնական զեկուցող Արման Պողոսյանը:
Ըստ նրա՝ սա հանրապետությունում աշխատող քաղաքացիների ընդհանուր թվի միայն 0,2 տոկոսն է: Ընդ որում՝ Պողոսյանը նշեց, որ Հայաստանում 1 մլն դրամից ավելի աշխատավարձ ստանում է մոտ 6200 մարդ: «Սա աշխատող քաղաքացիների ընդհանուր թվի մոտ 1 տոկոսն է: Ի դեպ, այս խմբի մեջ են մտնում Հայաստանի նախագահը, ինչպես նաեւ վարչապետը, Ազգային ժողովի խոսնակը եւ մի շարք այլ պաշտոնատար անձինք»,- պարզաբանեց փոխնախարարը:
Նրա խոսքով՝ եթե ցածր աշխատավարձ ստացող քաղաքացիներն այսօրվա դրությամբ վճարում են 23 տոկոս եկամտահարկ, իսկ 1 մլն դրամից ավելի ստացողները՝ 36 տոկոս, ապա եկամտահարկի հավասարեցումից հետո բոլոր քաղաքացիները՝ անկախ աշխատավարձի չափից կսկսեն վճարել 23 տոկոս, իսկ առաջիկա տարիներին եկամտահարկն ընդհանրապես կնվազի մինչեւ 20 տոկոս:
Նշենք, որ եկամտահարկը հավասարեցնելու գաղափարը արդեն հանրության շրջանում խիստ քննադատություն է հարուցել: