ԻՀՊԿ ՌՕՈւ հրամանատար Ամիր Ալի Հաջիզադեն ասել է, որ իրանական ՀՕՊ տեսադաշտում անօդաչուի հետ միասին հայտնվել է նաեւ P-8 (Պոսեյդոն) պարեկային օդանավ, տեղեկացնում է Tasnim-ը։
Նրա խոսքով՝ ինքնաթիռում եղել է 35 մարդ։ «Մենք կարող էինք խփել ամերիկյան ինքնաթիռը՝ անօդաչուների օգնությամբ, բայց մենք դա չարեցինք։ Մեր նպատակն էր անօդաչու սարքը»,- նշել է նա՝ ավելացնելով, որ այդկերպ ուղերձ է հղվել «ԱՄՆ ռեժիմի ահաբեկչական ուժերին»։
Ավելի վաղ ԻՀՊԿ հրամանատարությունը տեղեկացրել էր ամերիկյան անօդաչուի մասին, որը խփվել էր Իրանի օդային տարածքում։ Ընդ որում՝ ԱՄՆ-ը պնդում է, որ դրոնը գտնվել է միջազգային օդային տարածքում։
Իրանի ԱԳՆ մամլո քարտուղար Աբաս Մուսավին դատապարտել է ԱՄՆ անօդաչուի ներխուժումն Իրանի օդային տարածք։
Իր հայտարարությունում Մուսավին բողոք էր հայտնել «երկրի օդային տարածքի խախտման ագրեսիվ եւ սադրիչ քայլի» կապակցությամբ։ Նա ընդգծել էր, որ Իրանի սահմանների խախտման պատասխանատվությունն ընկած է այն կողմի վրա, որը կատարել է ներխուժումը։
ԱՄՆ նախագահ Դոնալդ Թրամփն իր Թվիթերում գրել է, որ Իրանը մեծ սխալ է գործել։ Ավելի ուշ Կանադայի վարչապետի հետ մամուլի ասուլիսում Թրամփը նշել էր, որ անօդաչուն կարող էր սխալմամբ խփված լինել։ Նրա խոսքով՝ դրոնը անզեն էր եւ գտնվում էր միջազգային ջրերի տարածքում, այն կարող էր խփել «հիմարի ու անբանի մեկը»։
«Ես կարծում եմ, որ, հավանաբար, Իրանը սխալ է գործել, ես կենթադրեի, որ դա գեներալ կամ ինչ-որ մեկն է եղել, որը սխալ է թույլ տվել՝ խփելով այդ անօդաչուն»- ասել է Թրամփը։