Հայաստանում քրդական համայնքի տասնյակ ներկայացուցիչներ այսօր՝ հունիսի 21-ին, բողոքի ցույց են անում ՀՀ գլխավոր դատախազության դիմաց։ Նրանք պահանջում են ազատ արձակել Արցախում 1 կիլոգրամ թմրանյութի գործով մեղադրյալ Այլազ Ամոյանին։

«Հարգելի դատախազ, հանցագործներին չեք պատժում, անմեղ մարդկանց եք ձերբակալում: Եթե ինքն արդար չի, հասնում է ամեն պատիժ, բայց իրենք արդար են: Խիղճ ունեցեք այս նոր Հայաստանում»,–նշում էին ցուցարարները:

Ցուցարարները պնդում էին, որ հարուցված քրեական գործում կա ազգային խտրականության հարց։

Այլազ  Ամոյանի պաշտպան Սյուզաննա Խչեյանը NEWS.am-ի հետ զրույցում պատմեց, որ Ամոյանի դեմ  քրեական գործ է հարուցվել 266–րդ հոդվածի 3-րդ մասով, 267.1 հոդվածի 4–րդ մասով թմրամիջոցների, հոգեմետ (հոգեներգործուն) նյութերի եւ դրանց պրեկուրսորների առանձնապես խոշոր չափերով մաքսանենգությունը, որի հետ կապված պաշտպանյալի մերձավորները գտնում են, որ ապօրինի մեղադրանք է առաջադրված, ապօրինի է կալանքի տակ գտնվում, գործի նախաքննությունն ավարտելու եւ գործը դատարան ուղարկելու հետ կապված իրենց դժգոհությունն արտահայտում էին բողոքի ակցիա անցկացնելով։ Նրանց կարծիքով՝ ազգային խտրականության հարց  է դրված։

Պաշտպանի խոսքով՝ գործի նախաքննության ավարտ է հայտարարվել, այժմ գտնվում են միջնորդությունների փուլում։ Գործը Ազգային անվտանգության ծառայությունն է քննում։

Նշենք, որ կալանքի տակ են գտնվում նաեւ երկու այլ անձինք։