Շիրակի մարզից հարյուրավոր անօթեւան ընտանիքներ դուրս կմնան բնակարանների հերթացուցակից ու այս տարի բնակարան չեն ստանա, եթե ընտանիքի բացակայող անդամ ունեն ու այդ անդամը լիազորագիր չի ուղարկել: «1988-ի աղետին կորցրել եմ 5 սենյականոց բնակարան: Բազմիցս խնդրով դիմել եմ մարզպետարանի համապատասխան վարչություն: Անօթեւանի կարգավիճակ ունեմ; Պետությունը ինձ բնակարանով ապահովել հրաժարվել է, քանի որ ընտանիքիս անդամներից մեկը Ռուսաստանում է եւ լիազորագիր չի ուղարկում, չգիտեմ նաեւ նրա տեղը, որեւէ լուր անգամ չունեմ արդեն քանի տարի»,-պատմել է գյումրեցի Սուսաննա Աթոյանը:
Շիրակի մարզպետարանի քաղաքաշինության վարչության պետ Ալբերտ Մարգարյանի խոսքով` նման 980 գյումրեցի տնակատիրոջ գործ է ուղարկվել ՀՀ քաղաքաշինության նախարարություն, որպեսզի ուսումնասիրեն, թե այդ ընտանիքներն օգտվելո՞ւ են բնակարան ստանալու իրավունքից, թե՝ ոչ:
Հիշեցնենք, փետրվարի մեկից մեկնարկած բնակարանների բաշխման նպատակով փաստաթղթերի ներկայացման նոր գործընթացը ենթադրում է, որ եթե ընտանիքների մեկ կամ մի քանի անդամներ բնակվում են արտերկրում, նրանք լիազորագրեր պետք է ուղարկեն: Փաստաթղթեր չներկայացրած անդամն այլեւս ընտանիքի կազմում չի հաշվառվում:
