Այս տարվա ապրիլին Հայաստանի բանկերի միության եւ Տնտեսական լրագրողների ակումբի համատեղ նախաձեռնությամբ տարբեր լրատվամիջոցների ներկայացուցիչների համար մեկնարկել էր ֆինանսաբանկային ոլորտը ներկայացնող սեմինարների շարքը. այսօր արդեն տնտեսական լրագրողներն ստացան մասնակցության հավաստագրերը:
Երկամսյա սեմինարների ընթացքում ՀՀ բանկային համակարգում ղեկավար պաշտոն զբաղեցնող մասնագետներն ու ֆինանսական ոլորտի փորձագետները դասախոսությամբ, հարցուպատասխանի ձեւաչափով անդրադարձել են լրագրողների հետաքրքրությունը շոյող եւ հասարակության լայն շրջանակներում քննարկվող մի շարք թեմաներ՝ ՀՀ սպառողական եւ հիփոթեքային վարկավորման շուկաներ, ավանդներ ու պարտատոմսեր, բանկային ռիսկեր, թվային բանկ, կորպորատիվ կառավարում եւ այլն:
Նախաձեռնության նպատակն է եղել լրագրողներին փոխանցնել հնարավորին չափ ավելի շատ տեղեկատվություն ՀՀ բանկային համակարգի գործունեության մասին, ինչն էլ կնպաստի նրանց կողմից ֆինանսատնտեսական ոլորտն ավելի խորը եւ համակողմանի վերլուծության միջոցով լուսաբանելուն:
Հայաստանի բանկերի միության գործադիր տնօրեն Սեյրան Սարգսյանի խոսքով բնակչության լայն շերտերի համար ֆինանսաբանկային ոլորտն ավելի ընկալելի, ըմբռնելի դարձնելու համար կա մեկ ճանապարհ՝ համագործակցություն լրագրողական համայնքի հետ:
Տնտեսական լրագրողները հավաստագրերի հանձնման հանդիսավոր միջոցառման ընթացքում ներկաների հետ կիսվեցին իրենց տպավորություններով, հայտնեցին շնորհակալական խոսք ու շնորհավորեցին միմյանց նոր կապեր ստեղծելու եւ լավ նախաձեռնությանը մասնակից լինելու առթիվ:
