ՆԱՏՕ-ի համար ՀԱՊԿ-ը լուրջ սպառնալիք չի ներկայացնում, հինգշաբթի հայտարարել է դաշինքի գլխավոր քարտուղար Յենս Ստոլտենբերգը, փոխանցում է «ՌԻԱ Նովոստի»-ն:
Ավստրալիա այցի շրջանակում Ստոլտենբերգը տեղական հետազոտական կենտրոններից մեկում մասնակցել է բանավեճի: Մասնակիցներից մեկը հարց է տվել, թե արդյոք ՀԱՊԿ-ը ՆԱՏՕ-ի համար զգալի սպառնալիք ներկայացնո՞ւմ է:
«Ոչ, եւ մի շարք պատճառներով: Մասամբ այն պատճառով, որ դա այնքան էլ ուժեղ կազմակերպություն չէ: Երկրներից որոշները ՆԱՏՕ-ի գործընկերներն են: Մենք այն չենք դիտարկում որպես մեր դեմ ուղղված: Ռուսաստանը մտնում է կազմակերպության մեջ, բայց մենք դաշնակիցներից որեւէ մեկի դեմ ոչ մի անմիջական սպառնալիք չենք տեսնում»,- պատասխանել է Ստոլտենբերգը:
ՀԱՊԿ-ի մեջ են մտնում Հայաստանը, Բելառուսը, Ղազախստանը, Ղրղզստանը, Ռուսաստանը եւ Տաջիկստանը:
Ավելի վաղ ՀԱՊԿ անդամ երկրների ԱԳ նախարարները ՆԱՏՕ-ի անդամ պետությունների ԱԳ նախարարներին կոչ էին արել 2 կազմակերպությունների քարտուղարությունների միջեւ կանոնավոր խորհրդակցությունների մեխանիզմ ստեղծել: ՀԱՊԿ-ում նաեւ ՆԱՏՕ-ին կոչ էին արել ավելի սերտ համագործակցություն հաստատել թմրանյութերի ապօրինի շրջանառության դեմ պայքարի ոլորտում:
