ԱՄՆ կատարելիք այցի շրջանակում տեղի կունենա Հայաստանի վարչապետ Նիկոլ Փաշինյանի ելույթը ՄԱԿ ԳՎ ամբիոնից։ Այս մասին սեպտեմբերի 6-ի մամուլի ասուլիսում ասել է ՀՀ ԱԳ նախարար Զոհրաբ Մնացականյանը։
Նրա խոսքով՝ այցելության օրակարգը բավական հագեցած է, եւ բացի ՄԱԿ ԳՎ նիստին մասնակցելուց՝ նախատեսված են բազմաթիվ երկկողմ հանդիպումներ։ «Մենք ակտիվորեն օգտագործում ենք ՄԱԿ հարթակը»,- փաստել է նախարարը։
Անդրադառնալով մամուլում արծարծվող՝ Թրամփ-Փաշինյան հանդիպման հարցին՝ նախարարը կոչ է արել չսեւեռվել հարցի վրա։ ԱԳ նախարարի խոսքով՝ հանդիպումը կա պլաններում, բայց առայժմ կոնկրետություն չկա։ «Բարձր մակարդակով շփումների պակաս չկա։ Ե՛վ Սպիտակ տանը, ե՛ւ Պետդեպարտամենտում։ Չկան նաեւ հետագա ակտիվացման սահմանափակումներ։ Եթե ինձ պետք է ինչ-որ բան ասել ամերիկյան կողմին, կարող եմ դա անել անհապաղ։ Ակտիվ աշխատում է նաեւ դեսպանությունը»,- ավելացրել է արտգործնախարարը։
