ՀՀ վարչապետ Նիկոլ Փաշինյանը քաղաքական սիրախաղ է սկսել որոշ լուսանցքային ուժերի հետ սեփական թիմի աջակցության մեջ վստահ չլինելու պատճառով: Այս մասին այսօր՝ սեպտեմբերի 6-ին, լրագրողների հետ զրույցում ասաց քաղտեխնոլոգ Վիգեն Հակոբյանը:
Նրա կարծիքով՝ վերջին 20 օրերին «ֆլիրտ» է սկսվել քաղաքացիական հասարակությանը մոտ որոշակի քաղաքական, հասարակական ուժերի հետ: Նա հիշեցրեց, որ օգոստոսի 22-ին ընդունվեց կառավարության հայտնի որոշումը, որի համաձայն՝ ֆինանսավորում տրամադրվեց 2 հայտնի կազմակերպությունների՝ «Իրազեկ քաղաքացիների միավորում» եւ «Transparency International», որոնք ասոցացվում են Սորոսի հիմնադրամի հետ: Բացի այդ, քաղտեխնոլոգը նշեց, որ բանակցություններ են ընթանում քաղաքական ուժերի հետ, որոնք ուղիղ կապ չունեն, սակայն ասոցացվում են վերոնշյալ հիմնադրամի հետ:
«Պատահական չէ, որ նախօրեին ՊՎԾ նախկին պետ Դավիթ Սանասարյանը հայտարարեց, որ իրենք կդիմեն գործը վերանայելու համար: Այդ ամենը պայմանավորված է իշխանությունների ներսում որոշակի խառնաշփոթով ու տարաձայնություններով: Դա մտահոգում է վարչապետին, որն էլ փորձում է նոր համաձայնությունների հասնել՝ կապված «թեժ քաղաքական աշնան» հետ: Փաշինյանը չի ապավինում միայն քաղաքական թիմի օգնությանը, քանի որ փորձը ցույց է տվել, որ այդ թիմը միշտ չէ, որ «սարի պես կանգնած է» նրա թիկունքին»,- ասաց Հակոբյանը:
Փորձագետի կարծիքով՝ ոչ իշխանական քաղաքական ուժերը, որոնք որոշակի ազդեցություն ունեն հասարակական տրամադրությունների վրա, սպառնում են պառակտել իշխանությունը: Հենց այդ պատճառով, քաղտեխնոլոգի խոսքով, Փաշինյանը սկսել է բանակցություններ վարել այսպես կոչված մարգինալ ուժերի հետ:
«Խառնաշփոթի մասին, օրինակ, վկայում է նաեւ Ամուլսարի հարցով իշխանությունների փոփոխական դիրքորոշումը»,- եզրափակեց Վիգեն Հակոբյանը:
Հիշեցնենք, որ ՀՀ վարչապետ Նիկոլ Փաշինյանը երեկ հանդիպել է «Սասնա ծռեր» կուսակցության առաջնորդ Ժիրայր Սեֆիլյանի եւ նույն կուսակցության քաղաքական խորհրդի անդամ Գարեգին Չուգասզյանի հետ:
