Ցավոք, ՀԱՊԿ հիմնական փաստաթղթերում չկա կետ, որն արգելում է զենքի վաճառքը երրորդ երկրներին, որոնք հակամարտության մեջ են Կազմակերպության անդամ մյուս երկրների հետ: Սեպտեմբերի 10-ին ԱԺ նիստում Հավաքական անվտանգության մասին պայմանագրում փոփոխությունների մասին Երկրորդ արձանագրության վավերացման հարցի քննարկման ժամանակ այս մասին ասաց ԱԳ փոխնախարար Շավարշ Քոչարյանը՝ պատասխանելով պատգամավորների հարցերին, որոնք քննադատել են ՀԱՊԿ մի շարք անդամների դիրքորոշումը, որոնք Ադրբեջանին ժամանակակից սպառազինության տարբեր տեսակներ են վաճառում:
Փոխնախարարի խոսքով՝ միջազգային իրավունքի տեսակետից նշված գործողությունները միանգամայն օրինական են եւ թույլատրելի: «Այդուհանդերձ, մենք ելնում ենք այլ հանգամանքից: Այն հարաբերությունները, որոնք ձեւավորվել են ՀԱՊԿ շրջանակում, ինչպես նաեւ ելնելով այն բանից, որ եթե մենք իսկապես ցանկանում ենք, որ այդ Կազմակերպությունը հեղինակավոր լինի, պետք է ՀԱՊԿ ներսում այլ հարաբերություններ կառուցենք: Կազմակերպության ներսում գոյություն ունեցող պայմանավորվածությունները պետք է առաջնահերթ լինեն փոխհարաբերությունների ինչպես երկկողմ, այնպես էլ բազմակողմ ձեւաչափերում»,- պարզաբանեց Քոչարյանը:
Ընդ որում՝ նա նշեց, որ Հավաքական անվտանգության մասին պայմանագրում դրույթ կա, որը Կազմակերպության անդամ երկրներին թույլ է տալիս առավել մատչելի գներով ձեռք բերել ժամանակակից սպառազինության տարբեր տեսակներ: «Եվ Հայաստանը դրանից օգտվում է: Մենք այդպիսի առանձին դրույթ ունենք ե՛ւ Ռուսաստանի հետ, ե՛ւ ՀԱՊԿ շրջանակում»,- նշեց Քաոչարյանը:
