Իրանը պատրաստ է հասնել Գործողությունների համատեղ համապարփակ ծրագրի (ԳՀՀԾ) հավելյալ արձանագրության անհապաղ վավերացմանը, իսկ դրա փոխարեն ԱՄՆ Կոնգրեսը պետք է հավանություն տա միջուկային համաձայնագրին եւ ամբողջությամբ չեղարկի Իրանի դեմ սահմանված պատժամիջոցները: Այս մասին Նյու Յորքում ամերիկացի փորձագետների հետ հանդիպման ժամանակ հայտարարել է Իրանի նախագահ Հասան Ռոհանին, հաղորդում է Mehr-ը:
Նրա խոսքով՝ ԱՄՆ-ի անմարդկային պատժամիջոցները չեն կարող իրենց նպատակին հասնել, եւ այդ առումով Իրանում ամբողջական միաձայնություն կա:
«Չնայած Վաշինգտոնի ակնկալիքներին՝ ճնշումներն Իրանի բոլոր կուսակցություններին եւ խմբերին ստիպել են ԱՄՆ-ին տարբեր ոլորտներում ընթացիկ խնդիրների միակ մեղավորը համարել»,- նշել է Իրանի նախագահը:
Ռոհանիի խոսքով՝ ԳՀՀԾ-ն լավագույն գործարքն էր, որը կարող էր լիներ: «ԱԷՄԳ-ի բազմաթիվ զեկույցները, որոնք պնդում են, որ Իրանն իրականացրել է իր բոլոր պարտավորությունները՝ չնայած այդ գործարքից ԱՄՆ-ի դուրսբերմանը, ցույց են տալիս, որ Իրանը չի ձգտում խուսափել իր պարտավորություններից»,- հավելել է Ռոհանին:
Նրա խոսքով՝ Իրանը պատրաստ է հասնել հավելյալ արձանագրության անհապաղ վավերացմանը: Խոսքը հավելյալ արձանագրության մասին է, որը պետք է հաստատվի Իրանի խորհրդարանի կողմից մինչեւ 2023 թվականը, այսինքն՝ համաձայնագրի կնքումից 8 տարի անց: Հավելյալ արձանագրությունը ենթադրում է ԱԷՄԳ-ին ժամանակին իրազեկում Իրանում նոր միջուկային օբյեկտների ստեղծման մասին, ինչպես նաեւ ԱԷՄԳ-ի կողմից գործող ատոմային օբյեկտներում ստուգումներ անցկացնելու թույլտվության ընդլայնում:
