«ԴիջիԹեք- էքսպոն» հայաստանյան ամենակարեւոր միջոցառումներից է, որտեղ մենք կարողանում ենք ի ցույց ամբողջ աշխարհի ներկայացնել մեր բարձր տեխնոլոգիական ընկերությունները: Այս մասին, այսօր՝ հոկտեմբերի 2-ին, լրագրողների հետ հանդիպման ժամանակ նշեց Բարձր տեխնոլոգիական արդյունաբերության նախարար Հակոբ Արշակյանը՝ հավելելով, որ անհնար է գերագնահատել այս միջոցառման կարեւորությունը:

Նրա խոսքով Հայաստանում այս տարի տեղի ունենալիք Համաշխարհային տեղեկատվական տեխնոլոգիաների կոնգրեսի մասնակիցները հնարավորություն կունենան Մերգելյան ինստիտուտի տարածքում մասնակիցը լինել եւ տեսնել հայկական տեխնոլոգիական ընկերությունների արտադրանքին, ուղիղ ծանոթանալ ամբողջ երկրի ներուժին:

«Մենք արդեն 23 երկրից նախարարների գլխավորությամբ հաստատված պատվիրակություններ ունենք, որոնք գալու են Հայաստան մասնակցելու Համաշխարհային տեղեկատվական տեխնոլոգիաների կոնգրեսին: Մենք նրանց համար այց կկազմակերպենք «ԴիջիԹեք»-ի տարածք, որտեղ ներկայացված կլինի տեղեկատվական տենոլոգիաների մեր ոլորտը»,-ասաց նախարարը՝ կոչ անելով համապատասխան ընկերություններին «ԴիջիԹեք»-ի տաածքում գնել տաղավարներ եւ ներկայացնել իրենց արտադրանքը:

Հակոբ Արշակյանը տեղեկացրեց, որ հատուկ տաղավարներ են հատկացրել սկսնակ ստատափերին եւ ինժեներական եւ ռազմարդյունաբերական ընկերություններին, որ նրանք անպայման ներկա լինեն այնտեղ:

ԱՏՁՄ գործադիր տնօրեն Կարեն Վարդանյանն իր հերթին նշեց, որ «ԴիջիԹեք-2019»-ը տեղի կունենա հոկտեմբերի 6-9-ին` Երեւանի Մաթեմատիկական մեքենաների գիտահետազոտական ինստիտուտի (Մերգելյան) «Երեւան Էքսպո» կենտրոնում: