Եմենի հյուսիսում կառավարող «Անսար Ալլահ» շարժման խռովարարները (հուսիները) հայտարարել են, որ պատրաստվում են Սաուդյան Արաբիային նոր հարվածներ հասցնել, եթե չարձագանքի խաղաղության իրենց կոչին, փոխանցում է «ՌԻԱ Նովոստի»-ն:
Անցյալ շաբաթ հուսիների Բարձրագույն քաղխորհրդի ղեկավարը հայտնել էր, որ իրենք միակողմանի կարգով դադարեցնում են Սաուդյան Արաբիային հարվածներ հասցնելը եւ թագավորությունից նույնպիսի գործողություններ են սպասում:
«Ընթանում են անսահմանափակ եւ ուժեղ հարվածների լայնածավալ պատրաստություններ՝ ագրեսորին ջախջախելու համար, եթե խաղաղ ջանքերն ու երկխոսությունը հաջողությամբ չավարտվեն»,- նշված է հուսիների Բարձրագույն քաղխորհրդի հայտարարության մեջ, որը հրապարակել է «Ալ Մասիրա» հեռուստաալիքը:
Քաղխորհուրդը նշել է, որ հարեւան թագավորության նավթային օբյեկտների վրա հարձակումն իրենց հնարավորությունների համեմատությամբ «այսբերգի գագաթն» էր:
Հուսիները մի քանի օր առաջ հրապարակել էին կառավարական զորքերի եւ սաուդյան սահմանամերձ Նաջրան նահանգում սաուդցի զինվորականների դեմ գործողության մանրամասները՝ այն անվանելով «Նասր մին ալլահ» (Հաղթանակ Ալլահից): Նրանք տեսագրություններ էին հրապարակել գերեվարված սաուդցիների խոստովանություններով: Խռովարարները ստանձնել են սաուդյան հանքավայրերում նավթամշակման գործարաններն անօդաչուներով պայթեցնելու պատասխանատվությունը, որը իրագործվել էր սեպտեմբերի 14-ին, բայց Սաուդյան Արաբիայի իշխանությունները հայտարարել են, որ հուսիները նման հնարավորություններ չունեն, եւ իրենց ձեռնարկությունների վրա հարձակումները իրականացրել է Իրանը: