Պաշտոնական այցով Սերբիայում գտնվող՝ Հայաստանի Հանրապետության նախագահ Արմեն Սարգսյանը տիկնոջ՝ Նունե Սարգսյանի հետ այսօր այցելել է Բելգրադի արեւմտյան մասում գտնվող Զեմունի վարչական շրջան, որտեղ, Ս. Գաբրիել Հրեշտակապետ եկեղեցու հարեւանությամբ, հայկական խաչքար է տեղադրված՝ ի հիշատակ 1988թ. Սպիտակի աղետալի երկրաշարժի օրերին Հայաստանին օգնություն բերելիս վթարված ինքնաթիռի զոհված սերբ օդաչուների։
Այստեղ նրանց դիմավորել է Սերբիայի Հանրապետության նախագահ Ալեքսանդար Վուչիչը։
Նախագահները հարգանքի տուրք են մատուցել զոհված օդաչուների հիշատակին։ Արարողությանը ներկա են գտնվել նաեւ զոհված օդաչուների ընտանիքի անդամները։ Հայաստանի եւ Սերբիայի նախագահները զրուցել են նրանց հետ։ Նախագահ Սարգսյանը մասնավորապես ասել է, որ պատահական չէր, որ այդ օրերին եղբայրական Սերբիան առաջիններից մեկը օգնության ձեռք մեկնեց հայերին։
«1988-ի աղետալի երկրաշարժը մեծ ողբերգություն էր մեր ժողովրդի համար, ու մենք կրկնակի ցավ ապրեցինք, երբ իմացանք, որ մեզ օգնության եկած օդաչուներն աղետի են ենթարկվել։ Զոհված օդաչուների հիշատակը միշտ մեր սրտերում է, եւ Հայաստանում, ինքնաթիռի կործանման վայրում, նրանց հիշատակին կանգնեցված է հուշարձան, որը դարձել է հայ եւ սերբ ժողովուրդների բարեկամության ինքնատիպ վկայություն»,-նշել է նա։
Նախագահ Սարգսյանը նաեւ տեղեկացրել է, որ այցի ընթացքում պայմանավորվածություն է ձեռք բերվել Գյումրին եւ սերբական Նովի Սադը քույր քաղաքներ հռչակելու մասին եւ ասել, որ ուրախ կլինի բոլորին հյուրընկալել Հայաստանում։
