Արցախի միջազգային ճանաչումը կնպաստի Հարավային Կովկասի տարածաշրջանի անվտանգությանն ու խաղաղության ամրապնդմանը: Այս մասին Ստեփանակերտում անցկացվող «Համագործակցություն հանուն արդարության եւ խաղաղության» համաժողովի ժամանակ հայտարարել է Արցախի ԱԳՆ ղեկավար Մասիս Մայիլյանը:
Նախարարը համաժողովի մասնակիցներին ծանոթացրել է Արցախի պատմությանն ու նշել, որ մինչ իր ելույթը ներկայացված ֆիլմը կօգնի պատասխանել բազմաթիվ հարցերի: Նա նշել է, որ ինքնորոշման մասին որոշումն ընդունվել է միջազգային եւ հայրենական օրենսդրությանը համապատասխան, եւ պատասխան է դարձել Ադրբեջանի կողմից մարդու իրավունքների մշտական խախտմանը, զանգվածային էթնիկ զտումներին, երկխոսության հրաժարումից եւ ուժի կիրառմամբ լուծումներից: Մայիլյանը հիշեցրել է, որ այդ պայմաններում պետության ստեղծումն ամենաօպտիմալ միջոցն էր:
Նրա խոսքով՝ 1994-ին հրադադարի մասին համաձայնագրի ստորագրումը հույս ներշնչեց, որ ճանապարհ կբացվի միջազգային ճանաչման եւ կարգավորման համար, սակայն խաղաղ գործընթացը բախվեց խոչընդոտների՝ հարցը խաղաղ ճանապարհով լուծելուց Ադրբեջանի հրաժարումի տեսքով: Խոչընդոտելով լիարժեք ձեւաչափի վերականգնմանն ու հրաժարվելով վստահության ոլորտի ստեղծման հարցով միջոցներից, շարունակելով սպառազինությունների մրցավազքը, սպառնալով նոր պատերազմով եւ խեղաթյուրելով հակամարտության էությունը՝ Ադրբեջանը խոչընդոտում է միջնորդների ջանքերին: Ավելին, մեկուսացման եւ ատելության քարոզման քաղաքականություն է վարում, խորացնում անդունդն ու ձգձգում որոշման հնարավորությունը՝ նշեց նախարարը: Մայիլյանը հայտարարել է, որ Բաքուն փոխզիջման ու մոտեցումները վերանայելու որեւէ նշան չի ցուցաբերում:
Նախարարը հայտնել է նաեւ, որ Ադրբեջանի գործողություններին ի պատասխան՝ Արցախի իշխանությունները շարունակում են միջազգային համագործակցության հարթման ջանքերը: 2012-ից մի շարք փաստաթղթեր են ընդունվել, Ավստրալիայի եւ ԱՄՆ-ի նահանգները ճանաչել են Արցախի անկախությունը, բարեկամության մասին համաձայնագիր է կնքվել ավելի քան 20 քաղաքների հետ: Քույր քաղաքների օգնությամբ տարբեր ծրագրեր են իրականացվել: Մասնավորապես, ֆրանսիական քաղաքների աջակցությամբ Արցախում շարունակվում է ֆրանկոֆոնիայի շենքի կառուցումը:
Նախարարն ընդգծել է, որ Արցախի ճանաչումը չի խոչընդոտում միջնորդների ջանքերին եւ լիովին համապատասխանում է բանակցությունների ոգուն: Միջնորդները նշել են, որ կարգավիճակի հարցը պետք է լուծի բնակչությունը, իսկ միջազգային ճանաչումը կօգնի վերջնական կարգավորմանը: «Արցախը տարածաշրջանում խաղաղության իր քաղաքականությամբ ցույց է տվել, որ կարեւոր դերակատարում ունի խաղաղության ճարտարապետության մեջ: Ճանաչումը թույլ կտա կիրառել փափուկ ուժ եւ կարեւոր է մարդու իրավունքների տեսակետից: Մարդու իրավունքները չեն կարող ոտնահարվել, իսկ իրավունքները չեն կարող սահմանափակվել միայն այն պատճառով, որ ղարաբաղցիներն ապրում են չճանաչված երկրում: Չի կարելի կարգավորման սպասմամբ սահմանափակել պետական ինստիտուտների զարգացումը»,- շեշտել է նախարարը:
Նրա խոսքով՝ Արցախի պետական ինստիտուտները հաղթահարել են ժամանակի փորձությունը եւ ապացուցել կենսունակությունը: Պատերազմի պայմաններում արցախցիներին հաջողվել է տնտեսությունը վերականգնել զրոյից, ստեղծել եւ ամրապնդել պետական ինստիտուտները, ջանքեր ձեռնարկել բարձր մակարդակով ընտրական գործընթացներ անցկացնելու, խոսքի ազատությունն ապահովելու համար: Ավելին՝ Արցախի ԱԳՆ-ն նախաձեռնել է ներկայացնել միջազգային համաձայնագրերի կատարման մասին ազգային հաշվետվություններ եւ ՄԱԿ-ում արդեն առաջին անգամ տարածել է քաղաքացիական իրավունքների կատարման մասին հաշվետվությունը: Արցախը միացել է ՄԱԿ կայուն զարգացման նախաձեռնությանը, որի շրջանակում Արցախում ստեղծվել է կայուն զարգացման ազգային խորհուրդ: «Արցախը մեծ թվով փորձությունների միջով է անցել, սակայն իր նպատակներին հավատարիմ է մնացել»,- շեշտել է Մասիս Մայիլյանը:
